July 1, 2024 (Thawhtanni) khan Relief & Development Department hnuaia Skill Training hrang hranga zir chhuak mi 26 pualin R&D Training Centre, Ramzotlang-ah Graduation Day hman a ni a. Rev. R. Lalnunzira, AGS – Service chu khuallian-ah hman a ni.
Programme hi Nl. Lalrdinthari Ralte, Field Facilitator-in a kaihruai a, Rev. Dr. Lalzarliana, Director, Communications Dept.-in Pathian hnena inkawltirna hunserh a hman zawhah Rbt Lalrinawma, Coordinator, R&D-in report tlangpui pe-in, Khuallianin Certificate hlanna a neih hnu-ah fuihna thuchah a sawi a, Rev. L. Vanlalsanga, Director, R&D-in Lawmthusawina neiin Malsawm tawngtaina-in hun a khar a ni.
Tun tumah hian Puanthui zir mi 16, Computer Course ah - mi 3, Baking zir chhuak 3 leh Beautician zirlai mi 4 , an vaiin mi 26 hnenah Certificate hi pek an ni. Puanthui zir chhuakte hi Puanthui khawl hlan an ni a, a dang zawng hi Certificate bakah hian an eizawnna bul tan nan Rs. 7,500/- pek an ni bawk.
Relief & Development Department hian hun rei tak atang khan Youth Skill Development Project neiin Puanthui zirna bakah Canadian Baptist Ministries nena thawhhona-in Thingtlang lama thalai lehkha thiam, eizawnna mumal nei lo te pualin thiam zirna hrang hrang – Computer Course, Chhang siam, Beautician, Electric Wiring leh Alluminium Fabrication te zirtir an ni.
