Sap Upa thlan - B281[/caption]
Lalrinawma Zadeng tuna U.K a awm mek (Pu K. Lalsanga, Ex.MLA, Lunglei Chanmari makpa) te chhungkua chuan Mizorama Chanchintha meichher rawn chhitu (Pioneer Missionries) te phumna thlan zawn chhuah hna chu bei zelin February 3, 2017 khan Sap Upa (Rev. FW Savidge) an phumna thlan chu an hmu chhuak ve leh ta. Sap Upa thlan hi Stretham Village Cemetery, Cambridgeshire, UK-ah awmin Plot No. B281 ah phum a ni.
Nikum 2016 khan Pu K Lalsanga, Chanmari, Lunglei, England zin chuan Pu Buanga thlan an lo zu hmuchhuak tawh a. BCM Assembly Executive Committee January 24-25, 2017-a neih chuan Pu Buanga thlan hmuh chhuaha awm ta chu lawmawm tiin, chei that dan kawng zawn ni se la, hemi rual hian Sap Upa thlan pawh zawnchhuah tumin hma lak ni se, tiin an rel a. Hetih mek lai hian February 3, 2017 khan Lalrinawma Zadeng te chhungkua chuan Sap Upa thlan hi an lo hmuchhuak ve leh ta a ni.
Pu Buanga leh Sap Upa thlan zawng chhuaktute vangin BCM lawm
Mizoram Baptist Kohhran chuan Sap Upa leh Pu Buanga te thlan zawn chhuah a ni ta hi lawmawm a hle a. BCM General Secretary, Rev. F. Ramdinmawia chuan “Mizorama Chanchin tha meichher chhitu (Pioneer Missionaries to Mizoram) pahnih Sap Upa (Rev. FW Sevidge)leh Pu Buangate (Rev. JH. Lorrain) te thlan thahnemngai taka zawng a, hun hlu tak leh sum tam tak senga an phumna hmun ngei hmu chhuaktu – Pu K. Lalsanga, Ex. MLA, Chanmari, Lunglei leh a makpa Pu Lalrinawma Zadeng, England-a awm mek chungah Mizoram Baptist Kohhran chuan lawmthu a sawi a. He an thawhrimna leh thahnemngaihna hi Mizoram Baptist Kohhran chuan a ngaisang a, achhuang em em a ni” a ti.
A sawi zelnaah, “Mizoram Baptist Kohhran, Executive Committee Meeting, January 24-25, 2017-a neih chuan Pu Buanga Thlan hmuh chhuah a nih thu a hriat khan lawmawm an ti a, ‘he thlan hi a hmunah chei that a, enkawl dan kawng zawn ni sela, hetih rual hian Sap Upa thlan pawh zawn chhuah tumin hma lak ni se’ tiin a lo rel tawh a. Chutih mek laiin Pu Lalrinawma (Pu K. Lalsanga Makpa) te thahnemngaihna leh inpekna avangin Sap Upa thlan pawh hmuh chhuah a lo ni leh ta zel hi lawmawm a ti em em a, thlan pawimawh pahnih hmuchhuaktu Pu K. Lalsanga leh amakpa Pu Lalrinamwia Zadeng te chhungkaw chungah Mizoram Baptist Kohhran chuan thinlung takin lawmthu a sawi a ni,” tiin a sawi.
.................................
Sap Upa (Rev. Frederick Willam Savidge) lunghahna zawngin – Lalrinawma Zadeng
Nikum August 2016 khan ka puzawn K.Lalsanga (ex-MLA) chuan kan nau neih denchhen in UK ah min rawn țawiawm a. Kan missionary hlui te lunghahna chhui chhuah hi ka puzawn rilru ah hian a thawk lian em em a. Ani October 2016 thla tawp lam maia Mizoram lama haw leh tur a ni nen keiin ka thaim ang tawk tawkin hma ka lo lak pui ve ta a. Tichuan ka puzawn in min rawn cham pui chhung ngei hian Pu Buanga thlan pawh kan zawngchhuak a ni.
Pu Buanga (Rev J.H.Lorrain) thlan kan zawn rual tho hian Sap Upa (Rev FW Savidge) thlan hi kan zawng ve bawka. Mi hre zau zawk tak tak te kan be rawn a, Rev.Dr PL Lianzuala (Chanmari, Lunglei) te, Rev.Dr CL Hminga (Serkawn), Pi Lalremsiem (Pray for the World Ministry) te leh historian Mike Petty te kal tlangin Sap Upa an phumna thlanmual tak hi chu nikum October 2016 vel khan Stretham Village Cemetery (Cambridgeshire, UK) a ni tih chu kan hre tawh a. Tichuan tum hnih lai chu he thanmual ah hian a thlan zawnchhuah tum hian ka puzawn nen hian kan han thawk chho nghe nghe tawh a. Amaherawhchu a thlan lung hmuh tur a awmloh avangin kan hmu zo ta lova.
Pu Buanga thlan kan zawn tuma kan thil hriatchhuah pakhat chu sapram thalnmual a thlan zawn dawn chuan thlan phumna number lo pawimawh zia hi a ni a (Mizoram lama tih ve theih a va duhawm em). Sap Upa thlan zawn nan pawh hian a thlan number chu hre ve thei ila chu an phumna lai vel chu a hriat ve theih mai awm mange tiin an phumna khua Stretham Parish Council (Village Council equivalent ti mai ila a sual tam awm love) chu kan be ta a. Anni lam hnathawk te an inthlak kual avang leh conference a sawi ho te an duh avangin an tum angin min rawn hriattir hma thei lova. Kumthar hnu ah thlanmual phumna record bu en ho turin appointment kan siam ta a.
Tichuan 3rd February 2017 khan kan chhungin kei, kan nu (Arimteii Khawlhring) leh kan fanu thla nga mi (Ellie) te chuan Stretham Parish Council a an hnathawk pakhat Pi Rachel Watts-i han hmu tur chuan kan han kal ta a. Ani hi a lo bengvar in phumna record pawh chu kan zawn buai ngai lovin a lo zawng hmu sa vek tawh a. Chuti mai ni lovin thlanmual lamah chuan min kalpui turin a lo in peih ap maia (Mizoram sawrkar hnathawk te tan entawn tur a va tam em). Tichuan Sap Upa thlan kan zawn chhan leh Mizoram lama Kohhran te tana a hlut zia te kan han sawi hnu chuan thlanmual lam pan chuan kan kal ho ta a.
Thlanmual kan va thlen chuan thlanmual record a a inziah angin an phumna lai bawr chu kan pan ta nghal a. Record a inziah ang takin Sap Upa an phumna hi plot no B281 a ni a. A plot area bawr vel ah chuan Sap Upa te family name Savidge tih thlan dang hmuh tur an awm nual nghe nghe a. Pu Savidge a te hi tun hma in Stretham khua ah hian chhungkaw hlun tak an ni thin tih min hrilh bawk a.
Tichuan kan han zawng kual a, plot no B281 ah tak chuan thlan lung hmuh tur chu a awm tawh lova. Amaherawhchu plot no B280 a an phum Sap Upa te laichin tho Cornelius Savidge a thlan lung chiang tak mai hmuh tur a la awm a. Tin, plot no B282 a an phum William Gautrey a thlan lung chiang takin a la awm bawka. Chumi thlan pahnih inkar tak ah chuan hmun awl awmin thlan tih pawh hriat tawh lovin phul an tova, chumi hmun tak chu an phumna hmun chu a ni tih kan chhui zawn ta a ni. Min va hruaitu Pi Rachel Watts-i tihdan takah 99.9% in helai hmun awl, plot B280 leh plot B282 inkar tak hi plot B281 Sap Upa an phumna hmun chu a ni ngei in kan hria a ni.
Hetia thlan kan han zawnna ah hian kohhran leh khawtlang te an lo țawngțaina ah kan lawm em em a, kan kal lam leh kan haw lam kan tluangin țawngțaina avang liau liau a kan hmuh ang han hmu thei hi kan ni. Lalpa chu fakin awm rawh se.
