Tunkar Pathianni, January 27, 2019 hi Phar pual Pathianni (The Leprosy Sunday) a ni a.  He Ni hi Mizoram Baptist Kohhran chuan urhsun taka hmangin Kohhran tinah Chawhma Inkhawmah hemi pual hian inkhawm Progamme siam a ni ang. Headquarters atanga thupui thlan sa ‘Ani chuan a lo khawngaih ta êm êm a (Marka 1:40-42) a ni ang.

‘Phar pual Pathianni’ hi 2006 Assembly rel angin January Pathianni hnuhnung berah hman thin a ni a. Kum danga kan tih thin angin Inkhawm thawhlawm hi TLM pual a nih avangin Headquarters-ah thawn tur a ni e.

.....................

PHAR PUAL PATHIAN NI  THUCHAH

Phâr pual Pathian ni (Leprosy Sunday) hi kum 1943 atangin kan Kohhran chuan kan lo hmang tawh thin a. Kum 1947-ah Assam Kristian Council chuan a huam chhunga Kohhrante chuan Phâr pual Pathian ni siam a, he mi nia thawhlawm pawh chu The Leprosy Mission tanpui nana pek ni se a tih chu keini pawhin zawmin, hun rei tak chu January thla Pathian ni vawi 4-na hi hman thin a ni a. Kum 2006 Assembly-in a rel ang khan January Pathianni hnuhnung ber hi tun thlengin hman thin a lo ni ta a ni. Hemi nia thilpek tlingkhawm hi BCM pawisa luh dan pangngaiin BCM Headquarter’s office-a chhun luh vek tur a ni.

THE LEPROSY MISSION RAWNGBAWLNA

Irish tlangval Welesly Cosby Bailley-a zirtirtu, Missionary tura inbuatsaih mek chuan India rama phâr khawngaihthlak em em, enkawltu tha nei lova kawtthler leh an dahkhawmna hmuna awmte a hmuhin a khawngaih em em a. Chung mite taksa leh thlarau chhanchhuah aia rawngbawlna ngaihpawimawh tur awm bikin a ring lo va, phârte tana rawngbawlna chu kum 1874-ah India ram Ambala (Chûng hun laia Punjab)-ah harsa takin bul a tan a. Tunah chuan khawvel hmun hrang hrangah Kohhran pawl hrang hrang 100 zet kan thawkho ta. Mizoramah chuan 1985 atang khan TLM rawngbawlna hi Promotional & Support hna thawkin tan a ni.

1. TLM hi India ram atanga tanin khawvel ram 51-ah rawng a bawl ta. India ram phar tamna State 10-ah Hospital, Mercy Home, Vocational Training Centre (VTC), Community Base Centre (CBC) hmangin rawng kan bawl mek.

2. Khawvel pum hi Region 3- Africa Region, East Asia Pacific leh South Asia Region (India etc) ah then a ni. International Headquarter London a ni. Phârte enkawlna leh an tana rawngbawlna Project 182 a nei. Khawvel hmun hrang hrangah thawktu 1600 vel an awm a ni.

3. South Asia Region Headquarters chu New Delhi ah a awm a, Noida (UP)-a TLM Media Centre chu Office pui pakhatah hmangin chubakah chuan South India lamah Zonal Office 2 a awm bawk. Tin, North East India Region rawngbawlna bikah Aizawl chu Headquarters niin India rama phârte tanpuina atan hma lak mek a ni.

4. India ram hi khawvela phâr tam berna ram a ni a, project pawh a ngah berna a ni. India ramah hian TLM-in phâr Hospital (damdawiin) 14 a nei mek a. Phâr dam lehte eizawnna tur zirtirna Vocational Training Centre (VTC) 6 neiin, an dam tawh hnu pawha an chhungte duh loh phâr enkawlna (Mercy Home) 5 a awm bawk. Princess Diana sum thawh hmangin Research & Media Centre, Noida-ah din a ni. NEI Office hmasa ber Aizawlah a awm a, Nagaland ah 2010 khan hawn a ni bawk.

TLM Hospital-ahte hian kum tinin mi 5,000 aia tam phâr enkawl an ni ziah a. Phâr dam leh mi 450 lai an eizawnna atana chhawmdawlna a pe thin a, an mamawh dan azirin enkawl zui reng (Rehabilitate) an ni. Phâr dam leh te tana thiamthil zirna a buatsaih VTC 6-ahte hian kum tinin student 1,000 velin an zir reng a, an zir chhuah hnuah an thawhna/bul tanna tur ngaihtuahsak thin an ni. Phâr natnain taksa peng a tihchhiatsak mi 1300 vel leh mit a tihchhiatsak mi 3,600 velte chu kum tinin an zaisak (surgery) bawk thin. Tin, a chunga kan sawi tak phâr dam leh an chhungten an ina haw an phal tawh loh ho enkawlna (Mercy Home) 5-ah mi 200/300 vel enkawl reng an ni bawk. Phâr naupang enkawltu nei lo leh sikula an admit duh loh 1334 velte chu kum tinin catch them young programme hmangin an zirna ngaihtuahsak thin an ni. Phâr dam leh chenna nei lote tan chenna in 200 vel sak sak ziah an ni a, eizawnna bul tan nan sum leh pai pek thin an ni bawk. An kea phâr natna veite bun tur bik Micro cellular rubber hmangin kum tinin pheikhawk tam tak siamsak a ni thin. Phârten Lal Isua an neih theihna turin Hospital leh Centre tinah counseling neihpuiin Chapel-ah te inkhawmpui an ni thin.

1985 atangin Mizoramah TLM rawngbawlna kalpui tan a ni a. TLM Mizoram Heaquarters Office chu Aizawl-ah a awm a, Sub-Office angin  Lunglei-ah neih a ni bawk.

TLM Mizoram Committee-chu rorelna sang ber chelhtu a ni a. A hnuaiah Committee hrang hrang leh Chapter leh Unit-te an awm. TLM Campaign Committee te, TLM Ladies Wing Committee-te bakah Mizoram pum puiah Chapter 24 kan nei  mek a. Tin, veng leh kohhran huapin hmun eng emaw zatah Unit kan nei bawk. Tin, Unit anga awm lem lo kohhran malah Promoter eng emaw zat kan nei a, Mizoramah hian kohhran pawl 7 BCM, LIKBK, ECM, PCM, SA, CCIM  leh IKK te kan thawkho a, chubakah chuan Catholic, Seventh day Adventist leh UPC NEI atangin pharte khawngaihtu eng emaw zat he rawngbawlnaah hian an tel bawk.

Delhi Headquarters atanga target an siam tihlawhtling turin kum tinin Unit, Chapter leh Promoter-ten nasa takin an thawk a, sum hi Delhi Headquarters-ah phârte enkawl nan thawn thlak vek thin a ni.

Zaipawl tha tak, TLM Choir kan nei a, Kohhran pawl hrang hrang atangin thahnemngai takin hma an la a, phârte tana campaigner tha tak an ni.