April 23, 2023 (Pathinni) kha Kristian Naupang Pawl Din champhaphak (KNP Day) vawi 80-na a ni a. Kumin KNP Day hi Pathianni a nih avangin Tualchhung Kohhran tam zawkah zing Inkhawm ah KNP Day puala hmangin, hun tam zawk KNP ten item hrang hrang te entirin hun an hmang a, thuchah sawitute pawhin KNP Day thupui thlan sa “Naupang te Chhandamna hriltu an ni thei” tih thu hmangin thuchah an sawi a. KNP memberte chauh ni lovin Kohhran mpui te nen he hun hi hlim takin hmanho a ni.
KNP Day atan hian April 23, 1943 Serkawn Kohhran-a Upa Committee in a rel anga Zosap Missionary Pi Zoduhi (Mrs.EM Oliver) leh Pi Rovi ten Naupang Pawl dina an inkhawmpuina hmasa ber chu hman a ni a. Hemi hnu hian Tualchhung kohhran hrang hrang ah intihhmuh chho zelin, 1967 Assembly chuan Tualchhung Kohhran tina din turin a rel ta hial a, 1968 atangin MBKHP enkawlna in KNP hi rampum huapin mumal taka enkawl a ni chho ta a ni. Mizoram Baptist Kohhran Inchhiarna hnuhnung ber, BCM Statistical Handbook 2022-2023-in a tarlan dnin tun dinhmunah KNP te hi Unit 439-ah member 29663 an awm mek a, BBC leh CBC te nena chhiar in Unit 516 awmin member 32572 an awm a ni.
