April 13, 2014 (Pathianni) hi Kohhran ni pawimawh – Tumkau Pathianni (Palm Sunday) a ni a. He Ni hi khawvel pumah Kristiante chuan urhsun takin an hmang thin a, Mizoram Baptist Kohhran pawhin Kohhran Nipawimawh zingah telhin urhsun takin kan hmang thin a ni. Kuminah hian Martarte Ni nen a inrual avangin thusawitu chuan a duh zawk zawk a sawi thei ang a, kumin Tumkau Pathianni thupui chu  ‘Phelh ula, han kai rawh u'. (Luka 19:30) a ni ang.

Tumkau Pathian Ni hi Lal Isua Jerusalema lal anga a luh ni hriat rengna ni a ni a. Pathianni a nih bakah Kristiante tan ni pawimawh bik, Lal Isua lal a nihna puan chhuah thar lehna hun leh amah chawimawina ni atan hman a ni. Hetianga hmang hmasa bertute chu Jerusalem kohhran an ni a, kum zabi 4-na tawp lamah an hmang tan chauh niin sawi a ni. A tak taka Lal Isua Jerusalem-a lal anga a luh atanga kum 300 hnu daihah he ni hi serh tan a ni chauh tihna a ni.

 Tumkau Pathian Ni hi ‘Hnehna nena (Jerusalema) luhna ni’ (Triumphal Entry) ti pawhin sawi a ni bawk. He hun hi a pawimawh em avangin Chanchin |ha bu ziaktu palite hian an ziak theuh a ni (Matt.21:1-17; Marka 11:1-11; Luke 19:28-42; John. 12:12-14). A pawimawhna chhan chu:

1) He khawvela a awm chhunga vantlang hriat khawpa langsara           Jerusalem khua a luh chhun a ni.

2) Tisaa a awm chhunga mipui vantlang chawimawi a hlawh ve tum                a ni.

3) Vantlang hriata Lal a nihzia tarlana a awm tum a a ni.

 Matthaia chuan he hun ropui takah hian mipui zinga a tam zawkin Lal Isua kalna kawngah chuan an puante an phah bakah thinga mi chhawl an sat a, an phah bawk tih a sawi a (Matt.21:8). Johana chuan Jerusalem mipuiten tumkau kengin an hmuak a ti a (John 12:12-13). Lal Isua chu Galili ram atangin a thilmak tih hmutu tamtakin an rawn zui a, Jerusalema khawpuia cheng, amah ringtute’n an lo hmuak bawk a, amah rawn zuitute leh lo hmuaktute chuan rilru hmun khatin Lal Isua chu an theihtawkin he hunah hian an chawimawi a ni. Chutianga amah ngaisangtuten an chawimawina chu chhunzawmin, tumkau/hnahchhawl chawiin Lal Isua chawimawina kawng zawh hi Kristiante zingah neihzui a ni ta zel a ni. Tumkau Pathian Ni-ah hian Lal Isua chawimawia tumkau nena kawng zawh hi naupang (KNP) tih turah kan dah deuh niin a lang a, a tawk lo hle. Jerusalem chhehvela mipui, Lal a nihzia la hre chiang tak tak lotute mahin khati khawpa an chawimawi chuan, keini a hre chiangtu, thinlung tihvar tawhte hi chuan theihtawpa chawimawi hi kan tih ngei tur a ni.

            A chunga kan tarlan ang khian vawiin thupui atan  “Phelh ula, han kai rawh u” (Luka 19:30) tih hi thlan a ni a. Ni Pawimawh bu buatsaihtute chuan kawng thumin thupui hi sawi nise a ti a; chung thupui hente chu kan chanchinbua leng tawkin ilo thlirho ang u.

1) Riangvaite, sal leh bawih tihduhdah tuarte zal>nna pe thei tu a ni (Isaia 61:13, Luka 4:18-19): Lei leh van lalber fapa Isua Krista chuan mihringte hi zal>n turin min duh a. Sabengtung pawh Ama chuanna turin phelh zalen a ni a; chutiang bawkin mi rethei, chanhai, riangvaite tan Isua hi a lo kal a ni.

2) Thilsiam zawng zawng  zal>nna pe tur a lo kal a ni. (Rom 8:1&2,18-21): Pathian hmangaihna leh Lal Isua min tlanna hi mihringte tan chauh ni lovin thilsiam dang zawng zawng tan pawh a ni.

3) Thihna phuar pawh phelh thei, zal>nna pe thei  a ni (cf. Lk. 8: 49-55; John. 11:43-44; etc): Lal Isua hmangaihna chuan chatuan nunna kan neih theihna turin kan sualna lak ata min chhanchhuak thei a; min chhanchhuah hi a duh ngawih ngawih a ni.