Baptist pastor te zinga Isua lokal lehna tuipui leh thuk taka luhchilhtu Rev. Dr. PL. Lianzuala lehkhabu thar ' Ni Ropui A Lo Thleng Dawn Ta' tih chu January 28, 2026 ( Nilaini) khan BCM Assembly Executive Committee ลฃhutkhawm zawhah BCM Headquarters Office, BCM Hall-ah BCM President Rev. Dr. C. Vanlaldika chuan a tlang zarh.
Lehkhabu ziaktu Rev. Dr. PL. Lianzuala chuan " Mizoram kristian, kum za chuang fe a upa, missionary pawh tirchhuak ve teuh tawh leh mahni pawh inenkawl theia kan inchhal lai a, Bible in kan khawvel hun lo thleng tur indawt dan a sawi te mumal deuha inzirtirna kan tlachham hian Kohhran atanga insuan te, pawl chhuahna te a hring a. Thil tam tak hi a hun a lo thlena kan la hriat turte awm bawk mahse kan ngaihvena kan zira kan hriat tur Bible-ah hian mitthi thawhleh thuah te, mi thianghlim lawr, hrehawmna hun, sakawlh, Harmageddon, kum sang lal ram, Pathian rorel dan tur leh lei thar leh van thar lo tawlhchhuk hun tur min hrilh te hi kan ngaihtuah a hun tawh tak zet avangin inralrinna tawtawrawt kan han ham a ni" tiin a lehkhabu ziak chhan a sawi.
Tlangzarhtu Rev. Dr. C. Vanlaldika, President BCM chuan he lehkhabu hi kohhran hruaitute leh Lal Isua lo kal lehna nghaktute tan chuan chhiar ngei chi nia a hriat thu a sawi bawk.
Tlangzarh inkhawm hi Rev Lalrintluanga, AGS Mission BCM in kaihruaiin Rev Dr H Lalthlamuana GS, BCM chuan malsawm tawngtaina hun a hmang a ni.
