March 4-8, 2026 chhung hian BCM rorelna sang ber BCM Assembly chu BCM Biak In Bazar Veng Lunglei-ah nghah a ni dawn ta. Assembly Thupui atan “Dak ula lote en rawh u”(Johana 4:35) tih a ni ang.
Hun hman dan tur tlangpui chu hetiang hi a ni ang:
March 4, 2026 (Nilaini zan) Assembly tan zanah Rev. Dr. C. Vanlaldika President-in inkhawm a kai hruai anga, Assembly hawnna a nei nghal ang. Rev. Laltanpuia Colney-in “Pathian ram tulna” tih thupui hmangin thupui sawi hawnna a nei ang. Ningani zing atanga Pathianni zing thleng Bible study&Tawngtai inkhawm neih thin a ni ang. Ningani atanga Inrini thleng chhun lamah Assembly rorel neih niin, zanlamah Pathian Biak inkhawm a awm thin ang, Ningani zanah Rev. K. Vanlalmuana’n “ Rinna leh Beiseinaa chanchin tha hril’ tih hmanga sawiin, Zirtawpni zanah Rev. K. Lalnunsanga Director, Christian Education Department-in Sunday School ti tha lawmman semna a nei anga, Rev. Zirsangliana Ralte in “Pathian ram din- Inhlanna leh thilpekin” tih hmangin thuchah a sawi ang. Inrinni zanah Rev. Lalzarliana Khiangte-in “ Chanchin Tha hril nunpui kohhran” tih thupui hmangin thuchah a sawi anga, General Secretary Rev. Dr. H. Lalthlamuana’n Pastor Pension turte thlahna leh Certificate hlanna a nei ang. Pathianni zing inkhawmah Ordination service neih a ni anga, President thar Rev. Prof. R. Zolawma’n inkhawm a kai hruai anga, Rev. T. Lalsangvunga Director Pastoral Department-in nemngheh turte inhmelhriatna a nei anga, President Rev. Prof. R. Zolawma’n nemnghehna leh thuchah a sawi ang. Chawhnuah Lalpa zanriah Sacrament kil hovin Rev. Lalremsiama Ralte-in a buatsaih anga, Pathianni zanah President kal chhuak Rev. Dr. C. Vanlaldika’n “Thupek zawm malsawmna” tih thupui hmangin thuchah a sawi ang.
Assembly chhung hian BCM Choir, Area Baptist choir te bakah Pastor bial hrang hrangte leh Baptist Masihi Choir ten zaia rawngbawlna an nei ang. Kum 2026 BCM Assembly inkhawm hi BCM Official Youtube Channel KHAWNVAR-ah a Live thin a ni anga, BCM Assembly rorel hi BCM website mizobaptist.org-ah leh BCM Face book page-ah te tarlan thn ani ang.
