November 7, 2022 (Thawhtanni) a Education Department Sub-Committee Meeting, AGS – Service Room-a neih chuan BCM Assembly thurel bawhzuina leh Education Department Committee thu dah bawhzuiin, Lunglei chhim lama-a Baptist English School Extension din turin ruahmanna a siam a. Kum 2023 Session thar atanga tan theih turin Nursery atanga KG (2) thleng dah phawt ni se, hemi atana tul leh pawimawh, Zirtirtu, bungraw tul leh Building ruahman te chu Office lam leh School lamin lo buaipui se tiin an rel a. School hmun tur hi lei fel tawh niin, hemi sak puitlin hma atan Centenary Building, Chanmari ami chu Floor thenkhat luah rih a ni ang.

Meeting hi AGS Service Rev. R. Lalnunzira’n kaihruaiin, Education Director Rev. L. Vanlalsang’n report tlangpui a pe a. Report-in a tarlan zingah BHSS Administrative Building sak mek chu luah mai theiha peih fel a nih tawh thu leh Bial leh Tualchhung enkawl Baptist English School hrang hrang hnenah BCM-Education Department-in a pek thin tanpuina (grant) pawh sem chhuah thuai tum a nih thu a tarlang.