Academy of Integrated Christian Studies (AICS) chuan October ni 18 (thawhlehni) khan an kum 22 na lawmin Pathian hnena lawmthu sawina hun an hmang a. Zing karah AICS zirlai leh thawktu te bak ah AICS campus chhungkaw member te campus leh a chhehvel tifai in an hnatlang a. Chhun lamah Student Christian Movement of India, AICS unit te huaihawtin 'fun-fair' neih a ni a, intihhlimna chi hrang hrang buatsaih ani a. Tlai lamah ruai kilho a ni bawk.
Zan lamah Pastor Thanzinga Chapel ah 'AICS Ni' lawmna inkhawm neih a ni a, Dr. Andrew Lalhmangaiha Dean of Mission Studies in inkhawm kaihruaiin, Rev Dr C. Vanlaldika, Principal in fuihna thu tawi a sawi a, Rev. K. Lalbiakchhawna, Theological Education Committee member in thuchah tawi a sawi. He inkhawm ah hian zai leh item hrang hrang a awm bak ah, Pathian fak leh chawimawia zaihona hun hlimawm tak hman a ni.
AICS hi kum 2000 October ni 18 khan hawn (inaugurate) ani a, BD zirlai 17, Zirtirtu 3 leh thawktu dang 3 nen bul tan a ni a, Vawiin ah chuan BD, M.Div, M.Th leh Dip in mission studies zirlai mi 133 awmin zirtirtu 20 leh thawktu dang mi 17 an awm a. KG 1 atanga Class 8 thleng zirna School tha tak 'AICS Junior School' a awm bawk a, zirtirtu 13 awmin, zirlai 200 bawr an nei ziah thin a ni.
