Asia-Pacific Baptist Federation hnuaia Chhawmdawlna hna thawktu APB-Aid Director Pu Roshan Mendis chuan vawiin June 27, 2023 (Thawhlehni) khan BCM Headquarters Office, Serkawn tlawhin BCM hruaitute leh R&D hotuten an lo dawngsawng a. Zing lamah Thaizawl leh Bualte vela Raltlante awmna, Relief Camp tlawhin Thaizawl atanga lo let lehin Headquarters Office a Department hotute leh Fellowship hruaitute nen inkawmhona, BCM Hall-ah an nei a, Inkawmhona hi General Secretary Charge la mek, Rev. Dr. R. Lalthanmawia, AGS -Mission-in a kaihruai a ni.
He hunah hian APB-Aid hmalakna leh rawngbawlna hrang hrang sawihona hun hman a ni a - Khuarel Chhiatna hrang hrang - Lirnghing, Tuilian, Leimin vanga tuartute tanpui kawngah te, Indo leh Politics vanga Hlimtuar te chhawmdawl leh Tam leh Hri tha leng laka chhanchhuahna (Response) te, Hnam tlem zawk leh hnufual zawkte dawmkanna lam te, Ei leh bar leh intodelh kawnga Hmasawnna leh than zelna atana hma lak te, Inrem lo te inkara palai hna thawh leh ram leh khawtlang-a hnam hrang hrang leh mitin ten an chanvo dik tak an hmuh a, rorelna inang tlang an hmuh theih nana hma a lak dan te Presentation hmangin fiah takin a tarlang bawk.
Asia Baptist Federation hi Baptist World Alliance hnuaia Region pakhat niin, Asia Khawmualpui leh Pacific Thiarrkar te a huam a, Independent ram 22 awmin, Convention leh Assiciation 60 zet an in zawmkhawm a ni.
