Mizoram Baptist Kohhran – Area Baptist Council (ABC) Rorel leh Inkhawmpui chu November 24 - 26, 2023 chhung hian ABC 17-ah neih a ni dawn a. Zanin, November 24, zirtawp zan atangin Inkhawmpui hi tanin, Inrinni nilengin ABC Rorelna neih a ni ang, ABC Executive Committee thute bakah Pastor Bial atanga Agenda lut te, ABC kal tlanga Assembly 2024-a thlen tura chhawpchhuah te ngaihtuah a ni ang.
Inrinni zan, Pathianni zing leh Pathianni zan-ah te Pathian biak inkhawm neih a nih ang a, Pathianni chawhnu-ah Lalpa zanriah (Sacament) kilho a ni ang. ABC thenkhat-ah chuan inrinni rorel lai hian kohhran nawlpui emaw thalai huapin emaw a seminar buatsaih an awm bawk.
November 26, 2023 Pathianni zing inkhawm hi ABC hrang hranga Kohhran Upa Nemngheh inkhawm (Ordination Service) ah hman a ni ang a, kuminah hian BCM pumpui-ah Kohhran Upa atan mi 206 nemngheh tur an awm a ni.
ABC Rorel leh Inkhawmpui-ah hian Headquarters-a hotu thenkhat te pawh chanvo neiin ABC thenkhatah an chhuak dawn a, Rev. R. Lalbiakliana, General Secretary – Aizawl East ABC-ah hmangin, Pathian ni zanah thuchah a sawi ang. Rev. Dr. R. Lalthanmawia – AGS Mission chu Thenzawl ABC-ah Speaker niin hun a hmanpui ang a, Tv. C. Lalhmachhuana, AV Production manager pawhin Inrinni chhun ABC Rorel hlan-in Thalai Pual Seminar-ah Resource Person niin a hmanpui ang.
