May 29 - June 1, 2024 hian kum nga dana neih thin - Asia Pacific Baptist Youth (APBY) Conference vawi 18-na chu Melaka, Malaysia -ah neih a ni dawn a. Asia ram hrang hrang atangin Palai leh chhimtu an kal khawm dawn a ni.

Conference hming-ah hian APBY “Be” Conference 2024 tih niin, thupui hi Kolossa 3:16 thu tlawh chhanin, “Krista-a rinna nghet taka vuan tur te, khawvela Krista chanchin Tha chhi eng zel tur te, Krista hnungzui tu dik tak ni tur te, Pathian min pek kan talent te hmanga Pathian rawngbawl tur te, Kan Ringtu pui te leh rawngbawlpui te nena thawhhona leh inpawhna tha zawk siam turin tih te a ni a. Heng then hrang hrang khaikmawm hian "Be' tih hi Conference hmingah hian telh a ni. 

He Conference-ah hian MTKP atangin mi 22 -  MTKP hruaitu te –  Upa R. Lalrochama, President, Pu K. Lalawmpuia(Asst.Secrtetary), Rbt H. Lalruatkima (Fin.Secretary) leh, Upa Pc Vanlalrova, Senior Adviser te bakah MTKP Executive Committee member atangin mi 8 leh TKP Member 10  te MTKP hmingin an kal ang a, Hnahthial Pastor Bial pathum inzawmkhawm member 18 te chu BCM Zaipawl hmingin tirh an ni bawk. MTKP Team te hi May 27 (Thawhtanni) hian Lunglei  atanga chhuakin Malaysia hi an pan tawh dawn a ni.

MTKP aiawh-a kalte hian chanvo hrang hrang hetiang hian an nei dawn a – Nl. Esther Sailo leh Nl. Zirsangpuii te chu Workshop hran ve ve-ah resource person niin, Nl R. Lalthansangi chu Worship Team member-ah telin, Tv Jacob Khiangte, APBY Vice President ni lai mêk chu  Resource person pakhat niin "Youth Identity in Diaspora Community" tih thupui hmangin Workshop-ah hun a hmang bawk ang. BCM Choir te hian hla remna hun vawi hnih bakah cultural programme-ah Mizo hnam lam leh zai an entir bawk dawn a ni.