Baptist Church of Mizoram, Assembly hnuaia Rorelna sang ber, Assembly Executive Committee Meeting ni hnih awh tura ruahman chu January 17, 2024 (Nilaini) khan BCM Hall, Headdquarters Office, Serkawn-ah neih a ni a. Meeting hi BCM President, Rev. KV Thanga’n a kaihruai a, General Secretary Rev. R. Lalbiakliana’n Department hrang hrang report khaikhawmin a pe. Tun tum Executive Committee meeting-ah hian member 288 an kal a, Meeting hi ni hnih chhung neih tura ruahman ni mahse ni khatah an zo fel thei ta a ni
General Secretary Report chuan BCM leh Prebyterian Church of India, Mizoram Synod te nen a thawhhona-in Kristian Hlabu ennawn kalpui mek a nih thu te, Asia Pacific Baptist federation (APBF) Golden Jubilee lawmna, November 17 & 19, 2023-a Singpore-a neihah BCM hruaitu mi 12 leh BCM Choir member 23 an kal thu te, Baptist Centre-Falkland, Aizawl hawn a nih thu te, December 2023 chhungin Aizawl, Lawngtlai leh Headquarters, Serkawn-ah te Charity Christmas Programme hmangin Charity Fund atan sum thahnem tak hmuh a nih thu te, Bangalore leh Kolkata-ah te BCM din fel a nih thu te a tarlang bawk.
Mission rawngbawlna lamah January – December 2023 chungin Mission Field hrang hrangah ring thar 4686 an awm thu leh Kohhran thar 16 leh Fellowship thar 15 din a nih thu te, Relief & Development Department chuan Myanmar, Bangladesh leh manipur atanga raltlana te chhawmdawlna atan cheng nuai 44 chuang a sem chhuah thu te, heng sum te hi BCM Relief Budget te, APB-Aid leh Baptist Mission Australia atanga fund an dawn atang te-in pek thin a nih thu a tarlang bawk. Assembly thurel bawhzuina-in Mizorama Chanchin Tha lo thlen dan Documentary Film – Mingo Hnuhnung buatsaih mek a nih thu leh shooting zawh fel a nih tawh thu a tarlang bawk.
Vawiin Meeting thurel zinga Department hrang hrang atanga thawktu pension tur mi 10 report te, Thawktu mi 22 Confirm tura chhawpchhuah te, Pastor tur mi 5 lak thar te pawmpui tura thlen te pawmpuiin, Probationary Pastor kum thum thawk tawh mi 12 te Assembly-a Ordain tur chhawpchhuah te Interview neiin, an vaiin ordain turin thlan tlin an ni bawk. Heng bakah hian Upa Andrew Lalhmangaiha, Asst.Professor, AICS Ordain tura dilna chu remtih a ni bawk.
Meeting chuan Post hawn dilna hrang hrang – Pastor Post – 5, Missionary Post – 25 leh Dialysis Technician – 1 hawn dilna te, Medical Officer (Doctor) post ruak 4, General Service (Theologian) Post 3, BHSS Teacher Post 1 hnawh khah tura dil na te Assembly-a thlen chhoh a rem ti a, Department hrnag hrang-a Contract Post a awm mek mi 44 te dah ngheh (regularise) tura chhawpchhuah te pawh Assembly-a pawmpui turin thlen chhoh remtih a ni bawk.
Kum 2024-2025 Department hrang hrang Plan leh Budget te pharh a ni a, Central Sector-ah cheng nuai 4,957.52, Mission Sector-ah cheng nuai 3,925.07 leh Service Sector-ah cheng nuai 3596.39 niin, BCM Budget pumpui chu cheng nuai 12,478.98 pawm a ni. Kum hmasa aia budget kiamna hi cheng nuai 163.89 (za zela 1.3) a ni ang. Budget ruahman hi Assembly-a pawmpui turin thlen chhoh leh a ni ang.
