August 24, 2023 (Ningani) khan BCM Hall Serkawn-ah Ni khat awh Assembly Executive Committee Meeting neih a ni a. Meeting hi Rev. KV Thanga, BCM President-in a kaihruai a, Member te lawmna leh fuihna tawi sawiin, Pathian hnenah meting a hlan a. General Secretary- Rev. R. Lalbiakliana’n Department hrang hrang report te khaikhawmin a pe a, Report atanga zawhna te a chhang nghal bawk. Tun tumah hian Committee member 345 atangin 293 meetingah an tel thei a ni.
General Secretary report chuan Council of Churches in Mizoram din tura ruahmanna chu Kohhran Pawl tin ten an Rorelna-ah ngaihtuah tura chhawp a nih tur thu te, BWA Delegation Team te, APBF General Secretary te, APBF-Aid Director ten BCM an rawn tlawh thu te, BCM aiawha BWA General Council, Norway, National Council of Churches in India (NCCI) Assembly, Chin Baptist Association of North America Assembly ah te Palai in tirh a nih thu te, APBF Golden Jubilee, November 17-18 a awm turah BCM aiawh palai 9 leh BCM Choir te tirh an nih tur thu a tar lang bawk.
Assembly 2023 thu angin - Baptist Camping Centre, Serkawn-a buatsaih chu hman theiha hawn a nih thu te, Baptist Centre, Aizawl Building sakna tur lungphum phum a nih thu te, Champhai ABC thar hawn a nih thu te a tar lang a. 2023 April – August chhungin Kohhran thar pathum an din thu te a tarlang bawk.
Mission rawngbawlna lamah Sikkim Mission Field thar hawn a nih thu te, Mashihi Baptist Church hawn a nih thu te tarlangin, Kum 2023 January – June thlengin Mission Field hrang hrangah ring thar 2185 neih niin, Kohhran thar 4 leh Fellowship 4 din belh a nih thu a tarlang bawk.
Meeting thu rel langsar zingah – BCM-in Thawktute tana dan (Rules) a siam te zingah tih danglam rawtna hrang hrang te ngaihtuahin – chung zingah chuan President Charge Allowance tih bo rawtna te, Thawktute Extra Duty Leave tih bo rawtna te, Fixed Pay workers te dinhmun siam danglam rawtna te, Hna hming paih leh tihdanglam rawtna hrang hrang te pawm a ni a. AICS-a Asst.Proffessor pahnih – Vanlalpeka leh Johny C. Lalhmingmawia te Ordination pek remtih a ni a, Baptist Mashihi Evanmgelist pahnih – Pu Sibu Hansdak leh Pu DS Lalhmahruaia te serh leh sang khawih theihna pek remtih an nib awk. Heng bakah hian Pay Commission din rawtna chu pawmin leh AICS Dean ruat tharte pawmpui a ni bawk.
