Rev. Dr.K.Lalrinthanga[/caption]
Mizoram Baptist Kohhran Rorelna Sang ber, BCM Assembly chu March 6, 2019 (Nilaini) zan atangkhan Mizoram Baptist Biak In, Venglai, Lunglei-ah tan a ni a, rorel palai 1080 chuang an kal.
Chanchin kan lakkhawm lai hian Assembly Rorel palai inreport zat hi chiang taka hriat theih a la ni lo va, kan hriat theih hnuhnung ber chu palai 1080 vel an ni. Palai engngemawzat la in report lo an awm ni-a hriat a ni. Nimin, March 7, 2019 (Ningani) zing dar 9:30 khan Rorel Inkhawm tan a ni a. Rorel inkhawm hi Rev. C. Lalbiaksanga, President-in kaihruaiin Devotion hun hman zawhah BCM President Elect Rev PC Liadula hnenah President charge hlanin Rorelna dawhkan a kian a. BCM President thar hian Rorel a kaihruai nghal a ni.
Hun hmasa lamah President Elect thlanna neih a ni a. Rev. Dr.K.Lalrinthanga chu President Elect atan lungrual taka thlan tlin a ni a, BCM Constitutionin a sawi angin kum 2019-2020 chhung President Elect niin, 2020-2021-ah BCM President a ni zui dawn a ni.(Read Story)
Chanchin buatsaih lai hian thu rel dang hriat theih a la ni lo va, General Secretary report ngaihthlak leh Zawhna leh inhrilhfiahna hun atan hman a ni. Tin, Department thu te leh Assembly Executive thu, Assembly-a pawmpui tura tlen leh reoprt te ngaihthlain pawmpui an ni bawk.
Report atanga a lan danin Tun dinhmunah Mizoram Baptist Kohhran-ah Area Baptist Council 14, Pastor Bial 85, Tualchhung Kohhran 677 an awm mek a. Kohhran member zawng zawng 173373 awmin, Chhungkua 36242 an awm a ni. BCM hnuaia Minister (Pastor) Active Service - 154 an awm a, Probationary Pastor - 27, Kohhran Upa-3329 leh Rawngbawltu - 34150 an awm mek bawk.
Mission Field & Station - 24 awmin chungah chuan Missionary leh Local Worker -1297 Mission Field hrang hrangah an bung mek a. Kum 2018 January - 2019 January chhungin ringthar baptisma chang 4205 awmin, Kohhran thar 34 din a ni bawk (AGS Mission Report)
