Vawiin chawhma dar 10 atanga tan Assembly vawi 128 na rorel ni hnihna hi President Rev. F. Ramdinmawia'n a kaihruai a, Administrative Committee leh Assembly Executive atanga thu lut bak ah Area Baptist Council atanga thu lut te engemawzat ngaihtuah a ni.
Vawiin thurel ah hian Mizoram People Forum atanga thawk ho tura sawmna lo lût chungchang ngaihtuah a ni a, sawihona hun pawh rei tawk tak hawn a ni a, Assembly palai te pawhin MPF a tel ve tha an ti hle a, uluk leh ngun zawka ngaihtuah that leh ni se tiin rel a ni.
Thurel dang zingah, Christian Hospital Serkawn a hman tur CT Scan lei nan special appeal siam te, Parva-3 a mission school din te, 2025-26 atanga AICS a MTh. (Old Testament) hawn te, Higher & Technical Institute Mizoram, New Education Policy mila kalpui te a tel a. Kohhran hnuaia thawktu hrang hrang post thar, pastor 5, missionary 15, Nursing tutor 1 leh Dialysis technician 1 hawn remtih a nih bakah, hna ruak hnawhkhah tura dilna - Medical Officer 4, General Service (theologian post) mipa 1 leh hmeichhia 2, Higher secondary lecturer 1 te hnawh khah remtih a ni a, Kohhran hnuaia Department hrang hrang, Contract a thawk mek mi 45 te regular post-a hlan kai remtih a ni bawk. Baptist English School, Lungpuk leh Baptist English School, Hmawngbu te Mission School-ah dah remtih a ni bawk.
Zanin ah Pathian biak inkhawm neih chhunzawm a ni ang a, Rev. PC Lalropuia hnen atangin thupui 'Thil siamte nena inpumkhatna' tih ngaihthlak a ni ang.
