December 13 zan atanga ni 14 khan Baptist Boarding School, Chawngte chuan kum 50 an tlin champhaphak ‘Golden Jubilee’ an lawm a. He hun hmanpui hian Headquarters atangin Rev. Dr. R. Lalthanmawia, AGS Mission, Rev. Lalremsiama Ralte, Mission Director, F. Lalrammmawia, Production Assistant leh Pu H. Lalrinpuia Driver te an kal a. He school zirtirtu lo thawk tawh te leh zir chhuak tawh hmun hrang hrang atanga tel an awm bawk.
December 13, 2023 zan dar 6:30-ah Jubilee hawnna neiin, Rev. Dr. C. Lalruatthanga, Director, Chakma Mission –in Kalkhawmte lawmna thu sawiin Rev. Dr. R. Lalthanmawia’n Jubilee Souvenir tlangzarhin chibaibukna leh thuchah a sawi. Hnam lam hmuhnawm tak Chawngte 'P' Branch YMA leh Art & Culture, Chakma Autonomous District Council ten an entir a, BMS Bethbunya leh BBS naupangten Worship Dance hmuhnawm tak an entir bawk.
December ni 14 (Ningani) chhun ah School naupang te pualin Jubilee lawmna intihhlimna hun hman a ni a, zan ah Jubillee inkhawm awm lehin Rev, Lalremsiama Ralte, Director Mission Department-in thuchah a sawi bak ah sawrkar mi pawimawh leh BBS atanga zir chhuak mi hrang hrang ten thu an sawi bawk.
Baptist Boarding School hi kum 1973, January 20-ah Vaseitlang-ah din a ni a, 1984-ah Vaseitlang atangin Chawngte-ah sawn a ni a. Tun dinhmunah KG atanga Class X thleng Zirna awmin, zirlai 506 an nei mek a, Zirtirtu leh thawktu dang 17 an awm mek a ni.
