Mizoram Baptist Kohhran, Assembly Executive Committee, January 29 & 30-a neih chu vawiin khan zawh fel a ni ta. Meeting hi BCM President Rev.F. Ramdinmawia’n a kai hruaia, Pathian hnenah inkawl tirna a neih hnuin rorel tan ani.

Thureltlangpuite :

Maternity leave rules siam danglam chungchang ah Thawktu te'n nau neih chawlh (Maternity leave) an neih theih dan chu siam ṭhat a ni a, Contract Employee chuan thla 5 leave neiin, hlawh pum an la ang. Fixed Pay Worker chuan thla 5 leave an lak theih bakah hlawh chanve la thei tur a rel a ni.

Pastoral Committee in Probationary Pastor atana mi panga lak thar pawmpui a ni a, chungte chu:
1. V. Zonunsanga
2. R. Vanlalhmingmuana
3. V. Vanlaltlanhlua
4. J. Lalramchhana
5. K. Lalhriatpuia te an ni. 
An ni bak hian Pastoral Committee in Probationary Pastor mi panga Assembly a Ordain tur a chhawp chhuahte chu pawmpui an ni bawk. Chungte chu:
1. Lalduhawma
2. Vanlalthansanga
3. V. Lalramthara
4. Johana
5. C. Zomuankima te an ni.

BCM Assembly Hall sak mek hautak lo zawka chhunzawm dan tur Property Department in ruahmanna an siam leh Lirthei hlui hralh leh a thar lei tura rawtna an thlen chu Assembly a thlen chhoh tura pawmpui a ni.
BCM in Mission Field hrang hranga Association a thawhpuite’n thawh hona pawh sei an dilna chu BCM Assembly-ah thlen chhoh rem tih a ni.
Social Concern Committee-in Ruihhlo Ngaite Enkawln Home din an dilna chu zirchian ni se tih a ni.
Pastor 5 leh Missionary 6 bakah thawktu dang 2 lak thar dilna leh hnaruak hnawhkhah tur 18 awmte hnawhkhah dilna chu Assembly ah thlen nise an ti.
Kum 2025-2026 budget ruahmanna Finance & Pension Committee-in ruahmanna an siam chu Assembly pawmpui tura thlen remtih a ni a, Budget atan hian cheng nuaih 13,274.56 ruahman a niin, kohhran thawhlawm (Church contribution) aṭangin cheng nuaih 8,871.70 hmuh beisei a ni.
Pastoral Committee aṭangin kum 2024 chhungin Kohhran ding thar 6 a awm thu report a ni a, heng a hnuaia Kohhran hi an hming thlak a ni.

1. BCM Lungrang South - BCM Lungrang South 1
2. BCM Siloam New Lungrang - BCM Siloam Lungrang South
3. BCM New Secretariat Complex - BCM Capital Church
Hei bakah hian Chawngte East Pastor Bial chu Chawngte Pastor Bial tia thlak tur a ni bawk. Samuel Vanlalawmpuia Southern Baptist Convention hnuaia Associate Pastor hna thawk mek chuan a Ordination hriatpui (recognised) a dil a, Pastoral Committee hian a dilna hi pawmsakin recognised a ni a, hei hian BCM huang chhunga Serh leh Sang khawihtheihna erawh a huam lo ang.

Aizawl West ABC in Falkawna BCM Khual Buk (Guest House) a sak mek chungchanga rawtna a thlen chu General Secretary-in sawifiahin hmalak chhunzawm zel a nih thu a sawi.

Tun tum Assembly Executive ah hian mi 309 kalin, rorel tluang takin neih a ni a, heng an thu rorel te hi kumin BCM Assembly  March thla-ah pawm ani ang.