Vawiin chawhma dar 10 atanga tan Assembly rorel ni hnuhnung ber hi President Rev. F.Ramdinmawia’n kaihruaiin, Area Baptist Council, Assembly Executive Committee leh Administrative Committee atanga thu lut te ngaihtuah a ni a; kum 2024-25 chhunga Mizoram Baptist Kohhran budget cheng nuai 12,566.63 chu pawm a ni a, budget pumpui atanga kohhran in a thawhchhuah tur zat (Church Contribution) hi cheng nuai 8,481.42 a ni.
BCM hnuaia zirna in hrang hrang – AICS, HATIM, BHSS, BES leh Christian Hospital te dinhmun zir chianna (evaluation) neih ni se tih te, Zorinpui/Zochachhuah-ah Guest House sak te, Beirual thuzir-ah BCM kalphung leh inrelbawl dan zir te, kan rama eirukna hluar lutuk tibo tura hmalak te, Aizawla Counseling centre hawn te, ram pum huap awmnikhama tawngtai te, BCM pum huapa khua leh tui tha leh nun dan mawi inzirtirna neih te passed a ni bawk.
Zanin ah Pathian biak inkhawm neih a ni ang a, Rev. JC Vanlalluaia hnen atangin “Inpumkhatna: Mission Rawngbawlna ah” tih thupui hmangin thuchah ngaihthlak a ni ang.
Naktuk, March 10, 2024 - Pathianni zingah Pastor nemngheh Inkhawm a awm ang a, Rev. F. Ramdinmawia, President-in nemnghehna hi a nei ang. Nemngheh tur te hi pastor 9 leh theologian kohhrana thawk 3 an ni. Pathianni chawhnu-ah Lalpa zanriah kilhovin Rev. L. Lalsawmliana’n a buatsaih ang a, Pathianni zanah President kal chhuak – Rev. KV Thanga’n thuchah a sawi ang a, inkhawm banah Assembly a tiak ang.
