Mizoram Baptist Kohhrana thawktu te chuan January 10, 2024 (Nilaini) chawhma dar 11:30 khan kum thar atana Inhlantharna hun an hmang.
Lunglei-ah chuan Headqurters Office, Serkawn leh Lunglei-a Kohhran zirna in leh Office hrang hranga thawktu ten inhlantharna hi BCM Hall, Serkawn-ah an nei a, Rev. R. Lalnunzira, Associate General Secretary, Service in Inkhawm a kaihruai a. Pu V. Vuansanga, Principal, HATIM-in Pathianthu chhiarin tawngtaina a neih hnu-ah General Secretary Rev. R. Lalbiakliana’n Thawktute lawmna leh chibaibukna sawiin, BCM dinhmun leh hmalakna tlangpui a tarlang bawk.
Department hrang hrang atanga kal te inchhiarna leh inhmelhriattirna Pu Lalruatkima, Administrative Officer-in a nei a, HATIM, Headquarters Offce, BHSS leh Christian Hospital-a thawktute hnen atangin Group zai leh Solo te ngaihthlak a ni a, Rev. Dr. R. Lalthanmawia, Associate General Secretary - Mission in thawktu kalkhawmte fuihna thuchah sawiin, Thawktute Inhlantharna a kaihruai nghal a, Rev. K. Lalbiakeng, Principal, Jubilee Bible School-in Malsawm tawngtai-in Inhlanthar Inkhawm a khar ta a ni. He hunah hian Headquarters, Lungleia thawktu mi 400 zet an tel thei a ni.
Hemi ni vek hian Aizawl-ah pawh Baptist Centre, Falkland-ah Inhlantharna Inkhawm neiin, thawktu mi– 70 chuang an kal khawm a. Tv. Zosangzela Zongte, Office Assistant-in Inkhawm kaihruaiin, Rev. C. Vanlaldika, Principal, AICS-in Pathian hnena inkawltirna hunserh a hmang a, AICS staff te leh BLS Staff ten fakna hla sa-in Rev. B. Lalramhluna kaihhruaina-in Inhlantharna neih a ni a, Rev. R. Lalrintluanga, Executive Secretary in thuchah a sawi.
Lawngtlai-a thawktu te pawhin Tawnghtaina Tlang, Chanmary-ah Inhlantharna hi hmangin, thawktu mi 60 zet an kal khawm a, Rev. Lalzarliana Khiangte-in Inkhawm kaihruaiin, Pi Lalhlimpuii Hrahsel-in tanna leh Pathian hnena inkawltirna a hmang a, Rev. Dr. H. Lalthlamuana, Executive Secretary hnen atangin Thuchah tawi ngaithla-in Tv. Oscar Zaihmingthang leh Christian Hoaspital, Serkawn hnen atangin fakna hla ngaihthlak a ni bawk. Mahni Inhlantharna neiin tawngtaina room hrang hrangah kaldarhin hun an hman zawhah Upa H. Thankila’n Thawktute tana tawngtaisakna a nei a, Rev. Lalbiakhlua Chawngthu-in malsawm tawngtaiin hun a khar ta a ni.
Heng bakah hian Regional Office leh Mission Field hrang hrangah pawh Field Director te kaihhruaina-in Missionary leh thawktuten he Ni hi urhsun thakin an hmang a ni.
