Spetember 16, 2024 (Thawhtanni) khan Mizoram Baptist Kohhran leh Champhai Grape Grower Society te chuan Champhai Winery, Tlangsam-ah Inremna thuhtlung (Memorandum of Understanding) kum hnih chhung atan an ziak thar.
MoU ziak tharna inkhawm hi tlai dar 3:30-ah neih niin, Pu HS Vanlalfakzuala, Chairman, Champhai Grape Grower Society in a kaihruai a, Rev. Eddie Laldinsanga’n Pathian hnena inkawltirna hun hmangin, Pu Lalduhawma, Fatory Manager, CGGS leh Upa Biakchungnunga, Office Superintendent, BCM ten Report a pe a. Pu K. Zonunsanga, DHO Champhai thu an sawi bawk. Inremna-ah hian BCM aiawhin General Secretary Rev. Dr. R. Lalbiakliana, Rev. Vanlalnghaka Jongte, leh Upa Biakchungnunga, Office Superinendent ten hming ziakin, Champhai Grape Grower Society lam atangin – Chairman - Pu HS Vanlalfakzuala leh General Secretary Pu C. Zohmingliana ten hming an ziak a, Pu K. Zonunsanga, DHO Champhai Distirct-in hming a ziak bawk.
Mizoram Baptist Kohhran chuan kohhran serh leh sang pawimawh tak Lalpa Zanriah buatsaihna Sacramental wine siam chhuah chungchangah Champhai Grape Grower Society nen November 11, 2016 khan thawhhona thuthlung (MoU) siamin, heta tang hian Champhai Grape Grower Society te siam chhuah zel hi Sacramental Wine atan hman a lo ni ta a ni.
"Sacramental Wine bottle khat hi 750ml niin, a man hi Rs. 150 a ni. Excise duty, Road Tranport leh Permit te Baptist Church of Mizoram in a buaipui ang. Sacramental wine quality; Bottle, Colour, Acidity, Taste leh a rim te hi MoU ziaktu te pahnih remtihna tel lovin tih danglam theih a ni lo vang a, Kohhran dangte pawhin he sacramental wine hi an hmang ve duh a nih chuan General Secretary BCM hnenah emaw, General Manager, CGGS hnenah emaw an thlen ang a, Party pahnih te remtihna in an hmang thei ang". tiin MoU-ah hian tarlan a ni.
