Hemi zawh hian Biak In ah, Pathian hnena lawmthusawi Inkhawm neih chhunzawm a ni. Inkhawm hi Upa C. Vanlaltana Treasurer BCM Seling-in a kaihruai a, Upa F. Hranglawma Head Assistant, ES office Aizawl in inkhawmna Pathian hnenah hlanna a nei a, Rev. R. Lalrintluang Executive Secretary, Aizawl hnen atangin Pathian thuchah ngaihthlak a ni. Tlailamah Jubilee ruai theh a ni. Zanlamah ah pawh Jubilee lawmna inkhawm neih chhunzawm lehin, Upa H.Lalchhuanawmi’n inkhawm a kaihruai a, Rev. J. Lalpiantluanga Bialtu Pastor Khumtung Pastor Bial in Pathian thuchah a sawi. Zing leh zan Inkhawm-ah hian Aizawl area choir leh Khumtung Kohhran zaipawl, BKHP Seling Unit zaipawl te bakah Nl. Vanlalchhanhimi leh Tv. Lalremtluanga ten zaia rawngbawlna an nei thin a ni.
BCM Seling kohhran hi Kum 1997 october 5 (Pathianni) khan Seling Community hall ah hawn a ni a, kohhran hawn tirh hian kohhran member 40 awm in mimal in ah inkhawmna an nei thin a, Kum 1998 khan BCM Hqrs lamin inkhawmna atan mimal in dingsa lei sakin inkhawm nan an hmang chhunzawm nghal a, biak in atana sa chho nghal in, a remchan dan anga luah chhunzawm a ni a, hawn theiha sak peih tep a ni tawh a ni. Tun dinhmunah kohhran member 77 awm in Raltlan te nen member 100 chuang an awm mek a ni.
