Upa RTC. Lalthangura Baptist English School Zawlnuam-a thawk lai chu, March 22, 2025 zan dar 10: 45 khan City Hospital Aizawl-ah a borala, March 23, Pathianni khan Zawlnuamah ropui taka thlahliam a ni ta.
Upa RTC. Lalthangura hi Lalhmingthanga (L) leh Siamkungi te fa 7 zinga 5-na niin, August 13, 1966 khan Vaisam ( Jampui) khuaah a piang a. Kum 1994-ah Zawlnuamah an pem a, hetah hian an awm hlen ta a ni.
February 1, 1994 hian BES Zawluamah thawk tanin, thiamna lamah BA, B Ed. a ni a, he hna hi a hun tawp thlenga a vawn chu a ni ta a ni.
Kum 1997 January ni 30 khan Thangchhuahkimi nen Vaisam Baptist Kohhran-ah Dan puitlinga inneiin, fa Pathum an nei a, an fate chu-
1. RTC Lalremmawia
2. RTC Lalchhuansanga
3. RTC Lalmuanawmi
Upa RTC. Lalthangura hi khawtlang tana mi tangkai tak, hruaitu pawh lo ni tawh thin; pa nelawm leh zaidam, hun vawng dik mi, a hna leh a thil tihah tlai ve mai mai ngai lo, a duty leh Kohhran thiltih ngai pawimawh em em, a chanvo hlen chhuak ziah mi a ni.
BCM Zawlnuam Bawrai-ah Kum 2008 khan rawngbawtuah thlan niin , Kum 2019 khan Upa atan thlan a ni ta a ni. Kohhran tan a tangkai em em a, nihna leh chanvo pawimawh tak tak eng emaw zat chelh tawhin, chungte chu -
Kohhran Chairman, Secretary, Treasurer, Asst. Treasurer, Sunday School Superintendent, Bial Executive Committee member, Bial BKHP Adviser, BKHP, TKP, BMP Adviser mawhphurhnate a lo chelh tawh a ni.
Tunah hian Zawlnuam Pastor Bial BKHP Adviser, Bawrai Kohhran Treasurer, Sunday School Superintendent leh TKP Adviser ni lai mek a ni.
Upa RTC. Lalthangura hi hun eng emaw chen atang tawh khan zunthlum vangin a buai a buai tawh a . March 3, 2025 khan Zawlnuam PHC-ah inentirin, Kawrthah CHC-ah refer a ni a, that lam a pan theih mai loh avangin Aizawl-ah refer a ni leh a. Aizawl City Hospital panpuiin an Admit nghal a, test hrang hrang an tih hnuah zunthlum hian a kawchhung a ti chhe hman hle a ni tih hmuh chhuah a ni a. Heta tang hian a natna hian hmasawn lam aiin zual lam a pan hret hret a, March 22, 2025 Inrinni zan dar 10:45 khan Kohna pawimawh ber Van kohna chu chhangin min kalsan ta ni.
March ni 23, 2025 khan ama chena In Bawrai-ah amah thlahna hun hman a ni a, chawhnu dar khat khan BCM Biak In Bawrai-ah Vuina Programme hman a ni. Zawlnuam Bialtu Pastor, Rev. K. Lalrammawia’n hun a hmanga, Rbt.H Lallungmuana’n Pathian thu a chhiar a, Rbt.VL Malsawma, Secretary BCM Bawraiin Upa RTC Lalthangura chanchin a sawi a, Zawlnuam Pastor Bial Upa leh Rawngbawltute’n a kuangah Pangpar an dah a, Zawlnuam Pastor Bial Zaipawlte'n hnukulh teuhvin amah thlah nan hla an rem a, Bialtu Pastor Rev. K Lalrammawia’n vuina thuchah ropui tak a sawi zawhin, a lei taksa chu ropui taka thlahliam a ni ta a ni.
