May 4, 2024 kha Baptist Mipa Pawl (BMP) din champha phak vawi 44-na a ni a. Kumin BMP Day thupui chu “Kristian Chhungkua’ tih a ni. Hemi ni hian BMP Unit hrang hrang ten zingkarah khawlai tihfai hnatlang te an thawk a, Unit thenkhatah chuan awmni khamin nilengin hun an hmang.
Chhun lama hun hamng thei lo te pawhin zan lam-ah BMP Day puala Inkhawm buatsaihin thupui thlan sa hmangin thuchah ngaihthlak a ni. BMP Day hmanpui hian Mizoram BMP hruaitu te pawh Unit hrang hrangah kalin hun an hmanpui a ni. BMP Day inkhawm thawhlawm chu BCM Pandal Structure leina atan hman tura ruahman a ni.
Baptist Mipa Pâwl (BMP) hi May 4, 1980 khan Thingsai khuaah ‘Baptist Men’s Fellowship’ tia din tan a ni a. kum 1983-ah ‘Baptist Mipa Pâwl’ tiin Mizo tawngin dah tel a ni. Kum 1988 Assembly-ah BMP chu kohhran hnuaia pawl (fellowship) pakhat ni tura pawm a ni a, kum 2011 Assembly chuan BCM Planning Commission rawtna pawmpuiin, tualchhung kohhran bâkah Pastor Bial huapa inthlunkhawmna neih leh Bial Rorelna neih pawh a lo phalsak leh ta a ni.
5th Planning Commission-in BMP kalphung ruahmanna a siam angin Kum 2021 atangin Mizoram Baptist Mipa Pâwl (MBMP) chu Headquarters-ah full time Secretary neiin kalpui tan a ni a, Mizoram Pum huap BMP Rorel leh Inkhawmpui pawh khum hnih danah neih a lo phal sak leh ta bawk a, Mizoram BMP Inkhawmpui leh Rorel hmasa ber chu February 10-12, 2023 khan Hnahthialah neih a lo ni tawh a ni.
Mizoram Baptist Mipa Pawl inchhiarna 2023-2024 in a tarlan dan in BMP hi Pastor 78-ah Unit 351 din a ni tawh a, member 16068 chuang hlek an awm mêk a ni.
