February ni 8 -11 khan “Isaia 54:2 “I puan In hmun te chu zauh rawh” tih thupui-a hmangin Bru Baptist Church Assembly Vawi 16-na chu Kananktapara, Tripura Area ah neih a ni a, Inkhawmpui chhimtu mikhual 910 kal khawmin, Rorel palai 221 an kal. BBC Assembly-ah hian BCM aiawhin Rev. Habert Rorrelliana Sailo, Administrative Officer, (BBC) leh missionary Pu R. Thangluaia te an palai a ni.
Zirtawpni leh Inrinni-ah Assembly Rorel Inkhawm neih a ni a, an thu rel zingah 2024-2025 Budget atan cheng nuai 123, sing 4, sang 3 leh 622 pawmin, pastor pension kum 60 atanga 62 a tih pun remtih a ni a, Pastor post pakhat hawn remtih a ni a, Khristian Chhungkaw chawlhkar hman rawtna pawm a ni bawk. Assembly Chairman Elect-ah Upa C. Biakmawia thlan a ni. Pathianni zing inkhawma Rev. Habert Rorelliana’n thuchah sawiin Pathianni chawhnu-ah Rev. Lalzuitluanga’n Lalpa zanriah (Sacrament) a buatsaih a, Pathianni zan-ah Upa T. Kumthara, Outgoing Chairman-in thuchah a sawi thung a ni. Inkhawm apiangin Zaipawl hrang hrang zaiin, Assembly Rorel report leh BBC pawn lam atanga Kohhran te hnen atangin Chibaibukna te ngaihthlak thin a ni bawk.
Tun dinhmun ah Bru Baptist Church hi Area 5 –ah thenin, Pastor Bial 15 –ah Tualchhung Kohhran 102 an awm a, Kohhran member zawng zawng hi 17,311 niin, kum hmasa aia member punna hi 1069 a ni a, Kohhran thar 2 din belhin, kum 2023 chhungin ringthar (sakhaw dang atanga in let) mi 101 an nei a ni.
