July 7-12 chhung hian Khawvel pum Baptist Kohhran Inzawmkhawm (Baptist World Alliance) Rorelna sang ber Annual Council Meeting – BWA Annual Gathering ni bawk chu Lagos, Nigeria-ah neih a ni a. He Annual Council Meeting-ah hian BCM aiawhin President Rev. F. Ramdinmawia leh AGS Mission Rev. Dr. R. Lalthanmawia tean kal a, Meeting-ah hian telin hun an hmang mek.
BWA programme hrang hrang an hman chhung hian an hun awl-ah BWA hruaitute, BCM thawhpui Kohhran hrang hrang hotu lian te nen titihona te neiin, Nigeria a BCM Missionary te rawngbawlna hmun te an tlawh bakah, Nigeria Baptist hruaitute nen inkawmhona te an nei bawk. BCM hotu pahnih te hi July 16 hian Mizoram lo thleng chho leh tura beisei an ni.
Baptist World Alliance hi kum 1905 khan din a ni a, khaw vel ram hrang hrang 130 atangin Kohhran inzawmkhawm Pawl (Convention/Union) 253 an awm a, Tualchhung Kohhran (Local Churches) hi nuai 1, sing 7 leh sang 6 (176,000) awmin, Baptisma chang member maktaduai 51 zet an awm a ni. BWA hnuaiah hian rawngbawlna peng hrang hrang tam tak awm zingah – Mission te, Relief & Aid lam te, Human rights venhimna lam te, Khawvela remna leh muanna a awm theih nana thawh te hi a thupui ber te an ni.
