December 12, 2023 khan BCM Administrative Committee ruahmanna-in Christmas Charity Programme, BCM Mual, Serkawn-ah hman a ni a. Chawhnu dar 2:00 atangin sumtuakna dawr leh intihhlimna hrang hrang te hawn a ni a, LMC Area Bial TKP leh Bial BKHP ten buaipui in hun tha tak hman a ni. Zan dar 6:30 ah Charity Concert neiin, Nl. Lalhmingmawii Chongthu-in a kaihruai a, item hrang hrang - mal zai, Zaipawl, Live Band leh Group zai , Worship Dance leh Skit te awmin, hun hlimawm tak hman a ni. Tun tuma Charity Programme atanga sum hmuh hi cheng 7,83,820 zet a tling a ni.
Charity Christmas Programme-ah hian BCM Charity Fund thawhlawm tlingkhawm atangin - TNT Lunglei te, Bethel Centre te, Christian Hospital Serkawn Poor Fund, Chhawmdawlna In, BCO leh Jehova Jireh Centre, Hnahthial atan te Christmas thilpek General Secretary-in a hlan a ni.
Lawngtlai-ah pawh December 10 (Pathianni) chawhnu dar 1:00 khan Lawngtlai Area TKP bultumin Charity Christmas kawng zawh neih a ni a. Lawngtlai vengpui Volleyball Court, Mizofed Petrol Pump leh LCMC peng atang te in kawng zawh tanin, Areopagi-ah an intawkkhawm a, hetah hian a huhovin Charity Programme hman ho a ni. H. Vanlalpeka leh Annie Lalhriatchhungi ten an kaihruai a, Upa H. Remchunga, Sr.Adviser, LA-TKP-in pathian hnena inkawltirna neiin thuchah tawi a sawi hnu-ah zaithiam engemawzat zai ngaihthlak niin Upa Zozamliana’n Tawngtaiin hun a khar a ni. Lawngtlaia Charity Programme hman lai hian thawhlawm bawm hun a ni a, hetah hian cheng sing 3 leh zaruk (Re. 30,600/-) hmuh a ni.
Aizawl-ah pawh Charity Programme hi December 19 zan hian neih tura ruahman a ni a, inbuatsaihna kalpui mek a ni bawk.
