![](/storage/site/post-images/aa8d0e0b70ce628f629bf07a81e9e0f2.jpg)
June 11, 2024 (Thawhlehni) khan J.M. Lloyd Hall, Synod Office-ah Mizoram Kohhrante Inpumkhatna tura Council of Chuches in Mizoram (CCM) dinna turin Joint Committee meeting neih a ni a. He Meeting-ah hian Kohhran hrang hrang paruk - Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran ( Bualpui Ng) aiawhte an tel a ni.
Meeting hi Rev. R. Vanlalnghaka, Synod Moderator-in a kaihruai a, Secretary hnen atangin report ngaihthlak a ni. Secretary report-ah hian May 6, 2024 (Thawhtani)-a BCM Headquarters Office-a Drafting Committee thut khawm a nih thu te, May 2, 2024-ah Kohhran dang hruaitute kawmna hun hman a nih thu te, Church Council of Mizoram hruaitu turte ruat an nih tawh thu te a tel.
Meeting-a thu rel zingah Council of Churches in Mizoram (CCM) Constitution te, CCM Interim Budget ruahmanna te, Council of Churches in Mizoram hawn hun leh Programme te, kohhran pawl dang atanga member nih dilna te a ni a. Church Council in Mizoram din hun atan October 27, 2024 ruat chu pawm a ni a. CCM hruaitu chanvo insiamremna te, Kohhran tinin Office Bearer tura an ruatte chu pawmin, October 26, 2024-a CCM Rorel Inkhawmah hei hi pawmpui turin chhawp chhuah leh a ni ang.
CCM hruaitu atan heng te hi ruat an ni:-
President - Rev. R. Lalbiakliana, (BCM)
Vice Presidents -
a) Rev. B. Zazawna (LIKBK)
b) Rev. Lalrodinpuia L.S. Nghaling (IKK Bualpui Ng)
General Secretary (Full time) - Rev. Dr. Lalhmangaiha (MPC)
Joint Secretary - Rev. T. Salaw (ECM)
Treasurer - Upa R. Lalmalsawma (MPC)
Finance Secretary - Rev. Jessai L. Neitham (EFCI)
Council of Churches in Mizoram a lo pian theihna tur hian Joint Meeting hmasa ber chu January 24, 2023 khan BCM Headquarters-ah neih a ni a. He inhmuhkhawmah hian Drafting Committee din a ni. Drafting Committee ruahmanna chu May 19, 2023-ah Booth Manson Hall, Salvation Army Headquarters-ah en ho a ni a. Drafting Committee ruahmanna chu pawmin, mahni kohhran rorelna sang ber theuhvah ngaihtuah tura an thlen hnu-ah, April 3, 2024-ah JM Lloyd Hall, Synod Office-ah Joint Meeting hi neih leh a ni a.
Joint Meeting chuan CCM danpui lo duang tur leh CCM din hun leh programme te lo duang turin Drafting Committee kuta a dah chu Drafting Committee-in ruahmanna siamin tun tum Joint Meetingah hian pawm a ni ta a ni. Tunah hian Council of Churches in Mizoram dinna tura a kalkawng thui tak chu sial zovin, a kalphung leh hruaitu tur te, a din hun leh hmun tur te ruahman a lo ni ta a ni.