April ni 3, 2024 (Nilaini) khan Mizorama Kohhran hrang hrang te inthlun zawmna tur – Council of Churches in Mizoram din tura hmalakna leh din dan tur 'drafting committee' in a duan te thlir-in kohhran hrang hrang aiawh te Synod Office, Aizawl-ah an thukhawm a. BCM aiawhin General Secretary - Rev. R. Lalbiakliana, Rev. R. Lalnunzira, AGS-Service, Rev. R. Lalrintluanga, Executive Secretary, Aizawl, Rev. Vanlalmuankima, Director Pastoral Dept. Rev. Dr. C. Vanlaldika, Principal, AICS, Pu Lalruatkima, Administrative Office, Upa F. Aizama leh Upa PC Liankhama te an tel a ni.
Meeting hi Rev. Lalnghakliana, Moderator, PCI-in a kaihruai a, tun tum meeting-ah hian kohhran hrang hrang aiawh ten inrelbawlna leh kalphung tur an duan te chu an rorelna sang ber-ah an thlen thu leh an rorelna theuha thu tlukna report te ngaihthlak a ni a. Heng kohhran pawl hrang hrangte hian Council of Churches in Mizoram (CCM) din chu rem an tih thu report a ni.
Meeting hian CCM Constitution te, hawnna inkhawm programme te duang turin Drafting Committee kutah a dah a, July thla ah an thlirho leh dawn a ni. CCM hawn hun atan hian October thla chu tinzawn a ni bawk.
