April 4, 2019 (Ninganii) hi Mizoram Baptist Kohhran ni pawimawh zinga pakhat – “Harhna thlen Champha” a ni a. He Ni hi Pathian ni a nih loh chuan Headquarters atangin hman ngei ngei turin Kohhrante a phut lem lo a, hmang thei an lo awm erawh chuan thil lawmawm tak a ni ang. Kumin Harhna thlen Champha thupui-ah chuan "Sim ula hawi kir leh rawh u; chutichuan, Lalpa hnen ata harh hunte a lo la thleng ang". (Tirhkohte 3:19) tih thu hmana ni ang a, Tualchhung Kohhran-in Progamme an duh angin an siam ang.
Harhna thlen champha kan hman tan dan
Kum 2005 Assembly-in, “April 4, hi Mizorama harhna thlen champha-ah hman ni se,” tiin a rel a. 2006-ah Revival Centenary ram pumah lawm a ni a. Hemi kum 2006 atang hian BCM Calendar-ah chuantirin ni pawimawh zingah a lo tel ta zel a ni.
Kum 1894 January ni 11-ah Zofate Chanchin Tha min rawn hrilh turin Sap Upa leh Pu Buanga (F.W Savidge & J.H Lorrain)-ten Mizoram an rawn thleng a. An theih ang angin kawng hrang hrangin rawng an bawl a. Kristian engemaw zat an siam nain an pung chak lo em em a ni. Kum 12 zet a lo ral hnuin 1906 April ni 4-ah Thlarau Thianghlima Harhna ropui tak Mizoram pum huapin a lo thleng ta a. He Harhna hian Mizoram hmun hrang hrangah Chanchin |ha tidarh zau zelin kohhranhote nasa takin an lo pung a, nasa taka chakin hmasawnna ropui tak a rawn thlen a ni.
He Harhna hi Welsh ram harhna darh zau zel, Meghalaya-a cheng Khasi mite harhna atanga kan dawn chhawn ve a ni a. Khasi ram Moirang khuaa harhna thleng chhim turin Mizoram atangin Baptist Kohhran atang leh Presbyterian Kohhran atangin mi tlem te an zu kal ve a. Beidawng taka lo hawngin Aizawl an lo thleng leh a. Amaherawhchu Aizawl an lo thlen hnu April 4, 1906-ah Harhna chu an lo chang ve ta a. Hei hi Mizorama Thlarau Thianghlim Harhna an chan hmasak ber chu a ni. A khat tawkin Harhna chuan Mizoram a tuam fo thin a. Kan ram (Mizoram) vanneihna ropui tak a ni.
He Harhna hi heti tak hian ngaihlu mah ila, Kohhrante hian a champha ngaihhlutna hi tihlan kan nei meuh lo. 1985 Assembly-ah he Harhna Champha hi ni pawimawha neih turin ngaihtuah a ni a. Mahse a tlu zo lo va. 2005 Assembly-ah erawh chuan tihtluk a lo ni ta a. Ni pawimawhah kan hmang ta a. 2006-ah Revival Centenary ram pumah lawm a ni a. Hemi kum 2006 atang hian BCM Calendar-ah chuantirin ni pawimawh zingah a lo tel ta zel a ni.
..................
