DOCTOR ROPUI KAN CHAN TA
Christian Hospital Serkawn-a hun rei tak Medical Superintendent hna lo chelhtu leh Christian Hospital Serkawn hun harsa tak tanga khaichhuaktu Dr. Lallawma, (Kum-78) Surgical Specialist chu ย tukin November, 8, 2016 (Thawhlehni) zing dar 6:42 khan New Life Hospital, Aizawl ah a boral. Vawiin vek chawhnu dar 1:00 hian a chenna in, Chanmari, Aizawl-ah ropui taka thlahliam a ni.
Dr. Lallawma leh a nupui Dr. Lalsangliani te hian 1974 November 6-ah Mizoram Baptist Kohhran-in an sawmna leh ngenna chhangin Christian Hospital-ah Doctor hna an rawn zawm a. April 30, 1999-ah pension-in an chhuak a, Aizawl lamah awmin Greenwood Hospital-ah hun engngemawchen an thawk dun leh a, a hriselna lam a that tak loh hnu-ah hun engemawchen inenkawl chho-in tukin khan ropuina ramah min haw san ta a ni.
Christian Hospital-in Hun harsa leh thim tak a tawh laia Pathian rawngbawlna (Missionary) rilru pu chunga rawn inpe, a thawh hun chhung zawnga hmasawnna kawng hrang hrang amah kaltlanga Pathianin a vur te, Vawiina Christian Hospital Serkawn hmel lo lannaa sulsutu ber, Dr.Lallawma thihna hian Mizoram Baptist Kohhran mai ni lovin, Mizoram chhim lama Kohhrante leh mipui te a nghawng a, kan uiin a rawng lo bawltawhnate kan chhuang takzet a ni. Pathian leh Mizoram Baptist Kohhran tana mi tangkai leh mellung ropui tak min phun saktu Dr. Lallawma thihna hi Mizoram Baptist Kohhran chuan a sun takzet a, a kalsan, a nupui leh a rawngbawlpui Dr. Lalsangliani leh a chhungte zawng zawng thinlung takin a tuarpui a, Mizoram Baptist Kohhran Chanchin-ah a hming hi a dai tawh ngai lovang.
Vawina kan thlah tak Dr Lallawma hi Christian Hospital tan mai ni lo, BCM leh Mizoram tan pawh channa nasa tak a ni. Mizo doctor hmasa berte zinga mi a nih bakah Surgeon hmasa ber pawl niin, AIIMS New Delhi, India rama Medical College tha ber atanga Surgery PG degree nei hmasa ber a ni. Chu a thiamna ropui tak chu ama hlawkna leh ropuina atan hmang lovin a petu Pathian hnena hlan let vein a hun tha zawng zawng Pathian rawngbawlna tan a hmang zo thak a ni.
Christian Hospital Serkawna an rawn luh tirh hian ย Hospital-in Doctor puitling a neih loh lai leh hospital dinhmun hniam lai tak a ni a. BCM hotute mangang chuan Satribari Christian Hospitala NEICC hnuaia an thawh lai a ni a, missionary tura an inbuatsaih lai a ni bawk. Kan mamawhna a san em avangin BCM hotute sawmna chu Pathian kohnaa ngaiin, missionary rilru puin Christian hospitala thawk turin an rawn inpe ta a ni. Christian hospital dinhmun hniam taka awm tawh chu khaichhuak leh turin nasaย taka thawkin an theih tawp an chhuah a. Chu chu Pathianin malsawmin nasa takin hma a lo sawn a, tun dinhmun khum 100 awmna hospital hi min lo din sak ta a ni.
Tuna infrastructure kan neih tam tak OPD building leh In Patient building te hi an hun laia sak a ni a. Medical equipment lamah pawh chhim lama Ultrasound leh endoscope awm hmasa berte pawh hi an hun laia mi a ni. Tin, operation theatre leh labour room pangngai tak te leh tihdam rawngbawlna a tana thil pawimawh tam tak min hnuchhiah a ni. An rawngbawlna hlutzia leh contribution ropuizia hi sawi kim a har hle ang. An inpekna rah hi tunah hian keini Christian Hospital thawktute, BCM leh chhim lama Mizo mipuite hian kan swng mek a ni.
