October 1-3 hmang khan India Baptist Women’s Union (IBWU) General Assembly vawi 15-na Chennai, Tamilnadu-ah neih a ni a. Inkhawmpui thupui atan I Thessolonica 5:11 tlawh chhanin “I in dawmkang tawn zel ang u” (Build each other up) tih an hmang a ni. He Conference hmang hian MBKHP atangin hruaitute leh member an kal a, Kumin Inkhawmpui-ah hian Kum 2024- 2029 chhung atan India Baptist Women's Union (IBWU) President atan Rbt.Dr. Zoramthangi (MBKHP) chu ruat a ni.
He Inkhawmpuiah hian India ram state hrang hrang atangin palai kal thei chin bituk ruatin an kal khawm a, MBKHP hruaitute te hi chanvo pawimawh tak tak pek an ni a, MBKHP Secretary Nl. Lalhmingmawii Chongthu-in Cultural night ah hun hmangin Programme a kaihruai a, Rbt. Pi HK Lallianzauvi, President MBKHP-in Seminar kaihruaiin Pi F. Zanguri’n Hruaitu boral te sunna hun a hmang a, Dr. Zoramthangi’n a tawp zan Inkhawm a kaihhruai bawk.
Tun tumah hian IBWU hraitu thlan thar niin, hruaitu thar te lawmluhna lehhlanna neih a ni a, kum 2024-2029 atana IBWU hruaitu thlan thar te chu hengte hi an ni.
President : Dr Zoramthangi (MBKHP)
Vice President : Pulla Sampurna (TBUTWF)
Secretary : Ruth Anand Bangalore
Treasurer : Bonjera Sangma, Garo
IBWU President thar, Rbt.Dr. Zoramthangi hi Serkawn Lunglei a awm niin BCM Serkawn ah Rawngbawltu a ni. MBKHP –ah hruaitu hlun niin, Executive Committee member ah 2015-18 a ni a, Kum 2018-24 chhungin Finance Secretary hna chelhin, tunah hian MBKHP ah Executive Committee Member a ni leh mek a ni.
