Mizoram Kohhran Hruaitute Committee (MKHC) chuan kan hma lawka MP inthlan lo awm tur atan thuchhuah a siam a. Mizoram Baptist Kohhran member tin ten MKHC thuchhuah hi  zawm theuh turin kan in ngen nghal a ni. MKHC thuchhuahin a tarlan ang hian  April 5/6, 2019 ah Tualchhung Kohhran tinin kan remchan dan angin Tawngtai thupui hmang hian  ruahamna lo siam turin kan in ngen nghal a, hun a tepter tawh avangin Official Website leh Social Media-a tarlan hi thu tlingah ngai a, Bialtu pastor leh Tualchhung Kohhran Committee ten lo bawhzui turin kan in chah a ni. MKHC thuchhuah chu a hnuaiah hian tarlan a ni e.

 

Sd/-Rev.F.Ramdinmawia, General Secretary, Baptist Church of Mizoram

.....................................

 

MIZORAM KOHHRAN HRUAITUTE COMMITTEE (MKHC)

INTHLAN THUCHAH 2019

 

Kan hma lawk, April 11,2019-a kan ram rorêltu MP thlanna (Election) lo awm tûrah hian Mizoram Kohhran Hruatute Committee (MKHC) chuan Mizoram mipuite hnênah thuchah kan han siam a. He kan thuchah siam hi Mizoram mipui, Kohhran leh Political Party te pawhin ngai pawimawha lo zâwm hrâm tûrin Pathian hmingin kan ngên a ni.

  I. RAM PUM HUAP TAWNGTAINA: Inthlan tluang taka kan neih theih nân leh Mizoram aiawhtu tha kan neih theih nân April 5/6, 2019 Kohhran inkhâwmah kohhran tinte tawngtaina nei tûrin kan ngên a ni. II. RAM MIPUI LEH POLITICAL PARTY TE TAN:

1. Zalên tak leh duhthlanna hmanga mi tinin vote an thlâk thieh nân, hel pâwl leh râlthuam lam chi hman te, invau te, inbum te, sum sem te tih loh ni se.
2. Hnam bil zâwng te, khawtlâng inpumkhatna leh kohhran inunauna tichhe zâwngtein eng pâwl mahin hma lâk loh ni se.
3. Mi mal leh Pâwl insawichhiat vak vak te, tharum thawhna chawk tho zâwnga inelsên leh in auh nawmnah te tih loh ni se.
4. Therhlo leh sum ûma tumahin vote hralh loh ni se.
5. Kan ram, kan hnam leh sakhaw himna ngai pawimawh tur mi thlan chhuah theih ni se.

  III. THLANTLINTE CHUNGCHANG:

1. Thlan tlin apiang chu Mizoram Kohhran Hruaitute Committee chuan a mawhphurhna tha taka hlen chhuak thei tûrin duhsakna kan hlân a. Thlangtu mipui leh rorêltua ruattu Pathian zah chungin ram leh hnam tân hna thawk tur leh Party aiawh chauh an ni tawh lo va, Mizoram mipui zawng zawng aiawha ding a ni tih in hre reng tûrin kan duh a. Kan ram, kan hnam leh sakhaw himna ngai pawimawh reng tûrin kan beisei a ni. Kohhran leh Pâwl duhsak bîk nei lo va, angkhata an thu leh hla ngaih pawimawhsak tur leh Kohhrante thawhpui theia an awm kan duh bawk.
2. Tin, thlangtu mipuite pawhin thlantlin apiang chu kan ram tâna Pathian min pêkah pawmin sawisêl ringawt lovin i tawiawm tlat zâwk ang u.

 

MKHC aiawhin

(REV. R. LALRINSANGA) Secretary

(REV. R. LALHMINGTHANGA)   Chairman

  See Original Copy: MKHC Inthlan thuchah 2019