Baptist Church of Mizoram

INTHLAN THUCHAH LEH KOHHRANTE HNENA NGENNA

General Secretary, India ram rorelna sâng ‘Lok Sabha’ inthlanpui (General election) lo awm turah a hmasa bera vote thlakna April 19, 2024-a neih tûrah Mizoram chu kan inbuatsaih mêk a, he inthlanpui kan neih tur chungchângah hian Mizoram Baptist Kohhran chuan a hnuaia tarlan ang hian thuchah leh ngenna a siam:

India ram inrêlbâwlna kawnga kan rorêlna in sang ber ‘Parliament (Lok Sabha)’ a rorêltu tûrte thlanna neih tûrah Mizoram Baptist Kohhran chuan inthlanna fel leh thianghlim neih a duh.
Party hrang hrang leh candidate zawng zawng ten Pathian râwn chunga inthlanna (election) fel leh thianghlim a awm theih nân hma la theuh turin a ngen a, mipuite pawn theihtawp chhuaha tawiawm theuh tûrin a ngên bawk.
Mizoram Baptist Kohhran hi a din tirh atangin political party tan bik leh awn lam bik a nei ngai lo a, sawrkarna chelh apiang chu Pathian ram leh khawtlang hmasawnna tûr atân a tawiawm mai thin. Chu chu chiang takin Mizoram Baptist Kohhran Thurin Puanchhuah ‘Article No. 12 – Sawrkar’ ah ziak lanin a awm. Hetiangin:

Mihringte a huhova tha taka kan khawsak theih nâna ram rorêlna sawrkar awm hi Pathian ruat a ni. Chuvângin ram rorêltute chu kan tawngtaisakin an thu pawh Pathian Thu nen a inkalh loh chuan kan zawm tûr a ni. (Sam 72:11; Mat 22: 15-21; Rom 13:1-7; 1 Pet 1: 13-16).
Chuvangin Mizoram chhûnga chêng mipui zawng zawng ten vote thlak hi khua leh tui tha kan nihna kawngah kan mawhphurhna lian tak ani tih hriaiin, vote thlak theuh turin kan in ngen e.
Ram leh mipuite hmasawnna tur atâna kan ram Mizoram aiawha rorêltu tûr kan thlanna kawngah inthlanna muanawm loh thlen tir theitu hmanraw thalo lakah fihlim ni se.
Inthlanna thianghlim, hruaitu tha leh sakhaw zalenna kan neih zêl theihna tûrin Mizoram Baptist Kohhran hnuaia Tualchhûng Kohhran tinte April 13, 2024 (Inrinni) zan inkhawmah Inthlanpui (General Election) kan neih tur hi tawngtai thupuia nei theuh turin kan inngenin kan inhriattir e.