November ni 2, 2014 (Pathian Ni) hi khawvel Sunday School Ni a ni a, he Ni hi Mizoram Baptist Kohhran chuan kohhran tinah Pathianni zing inkhawm ah Headquarters atanga thupui thlan sa hmangin thuchah ngaihthlak a ni ang a. Hei bakaha hian Tualchhung Kohhran ten tul leh tha an tih angin hemi ni pual progamme hi an hmang dawn a ni.
Kuminah hian thupui atan “Pathian Thu thiltihtheihna” tih thlan a ni a. Heng Bible bung leh chang tarlan hmang hian thuchah sawi tura beisei a ni- Sam 119:105; Eph. 6:14-20; II Tim. 3:16 &17; Heb.4:14. Sunday School-ah 'Pathian thu zir pawimawhna' tih an zir thung dawn a ni. Pathianni zing Kohhran Inkhawma thuchah chhiar tur pawh buatsaih a ni a, chu chu he chanchinbu phek linaah hian tarlan a ni bawk.
Sunday School Pawimawhna:
1. Hmanlai hun atangin Kohhranah hian zirtirna dik lo leh him lo hi a lut fo thin a; chutiang hun harsatna karah chuan Sunday school chu Kohhran ral ven bîk ti hiala sawi thin a ni.
2. Kan Missionary te khan Chanchin Tha an hrilna hmun pawimawh tak chu Sunday School hi a ni a. Khawvel A AW B an zirtir rualin Thlarau lam A AW B pawh zir tel a ni thin hi Sunday School hlutna em em chhan a ni.
3. Kohhranah chuan tê ber atanga ian ber thlenga kan lawikhawm avangin kan rilru leh nun mil tawk ang zela Pathian thu taka inchawmna hmun pawimawh tak a ni.
4. Ringtute tinte hi rawngbawl tura chhandam kan nih avangin Sunday School hi rawngbawl tura kan inchherna pûm a ni.
.............................
Khavel Sunday School Ni Thuchah
Pathianni zing Inkhawm-a Chhiar chhuah tur
Sunday School lo intan dân:
Kohhranho-ten Sunday School kan lo hriat thin leh kohhran awmna apianga Sunday School kan neih thin hi, kum 1780-ah khan England rama Gloucester-ah Robert Raikes-an a din hmasa ber a. Hei hi lo thang lian zêlin Sunday School a lo pung chho ta a. Kum 1785 khân kohhran hrang hranga Sunday School chu inzawm khâwmin pâwl hmasa ber, Society for Promoting Sunday School a lo ding a. Chumi hnu lawkah chuan Sunday School Society tia thlâk a lo ni leh ta a ni.
India rama Sunday School lo intan dân:
Khawvel hmun hrang hranga Sunday School rawngbâwlna a lo darh zau zêl hnu chuan missionary, ram danga kal chhuak te pawhin Sunday School hi Chanchin Tha hrilhna hmun pawimawh berah an neih ta zêl a. India ramah pawh kum 1800 khân Baptist missionary Wiliam Carey-a te thian zaho khân Sunday School an lo din ve leh ta a ni.
Mizorama Sunday School lo intan dân:
January 11, 1894-ah Mizoramah missionary hmasa ber Sâp Upa leh Pu Buanga an lo thleng a. Anni pawhin Sunday School ngai pawimawhin kum 1896-ah Aizâwl-ah ngei Sunday School chu an lo din ve ta a. Chu chu BCM-in kan rama Sunday School hmasa berah kan pawm a. Mizoram chhim lamah chuan kum 1902-ah Tv. Thankûnga (a hnua Tirhkoh leh Pastor lo ni ta) chuan Sethlun-ah Sunday School chu a din ve leh ta a ni.
Khawvêl Sunday School Ni:
Khawvêl Sunday School Ni dintu chu Dr. George W. Bailey a ni a. Ani hi America (USA) mi niin, khawvêl puma Sunday School rawngbawlnaa mi pawimawh tak a ni. Kum 1907 khân ama huaihawtin khawvêl pum huap Sunday School Ni, Rome khawpuiah an lo hmang tawh a. Kum 1910 khân World Sunday School Association-ah President atân thlan a ni a. Chumi kum May, 22 chuan Washington khawpuiah khawvêl Sunday School Ni hi ropui takin an hmang a. Tunah chuan khawvel hmun hrang hrangah Sunday School Ni hi kan hmang ta hlawm a ni. India ramah chuan November Pathianni hmasa ber hi khawvel Sunday School Ni atân kan hmang a. Mizoram Baptist Kohhran hian kum 1939 khân All India Sunday School Union hi kan zawm a, chumi hnu chuan Christian Education on Evangelical Fellowship of India (CEEFI) zawmin, kum 2009 khân All India Sunday School Association kan zawm ve a. Tichuan, tûn thlengin khawvêl Sunday School Ni hi India ram hmun danga mite rualin kan hmang ve ta zêl a ni.
Sunday School pawimawhna:
Sunday School hian kohhranah pawimawhna a nei lian hle a. Kohhran a din tawh chuan Sunday School hi a ding nghal zêl tawh a. Kum 1904-a Sethlun-a kohhran inkhâwmpuiah chuan, “Kohhran din tawhnaah chuan Sunday School hi awm zêl rawh se” tih an lo rêl tawh a. Tûnah pawh hian Biak In kan sak rualin Sunday School Hall pawh kan ngaihtuahnaah a lang nghâl mai thin. Rev. Dr. V. Lalzawnga’n Sunday School pawimawhna a sawi thinah chuan, “Sunday School hi Mizote thiamna min petu, Kohhran dinhmun tinghettu, Kohhran ban a ni” a ti thin a. Tûnah pawh hian kan Sunday School thupui ber chu “Zir la, Nunpui rawh” tih a ni.
Hemi nia thuchah sawitute tanpui turin hengte hi târlan a ni a; a theih hrâm chuan hemi ni hian thupui sawi ni sela. Thlarau Thianghlim tanpuina zârah Sunday School-in mimal, chhûngkua leh kan ram nun hnuk a khawih danglam nasat theihzia pawh sawi uar nise. Hêng a hnuaia mite hi ngai pawimawhin hre reng ila:
1. Piang thar lo te Kristaa pian tharna an channa tûrin, chûng mi bote chu Krista ke bula hruai an nih theih nân.
2. Mihring dik tak ni tûra Pathian thua nun inzirtirna hmun a nih zia te.
3. Krista hniakhnung kan zuina kawngah min hruaitu atâna kan hman theih nân te.
4. Ringtuten vei tûr dik vei a, ngaihhlut tûr dik ngaihlu a, buaipui tûr dik buaipui a, kawng dik, Pathian thu hmanga kan zawh theihna tûr te.
5. Naupan laia Pathian thu kan zirnain kan puitlin thlenga kan nun min kaihhruai theih zia te.
6. Pathian thu hi man chawi ngai lova, athlâwna kan zirna hmun a nihzia te.
7. Hei hi mimal, chhûngkua leh ramin kan buaipui chuan Lal Isua rualin ringtuten ke kan pên ve ang a, Pathian duh dân ngai chângin kan nun leh hun te kan hmang thei dâwn a ni.
