Mizoram Baptist Kohhran chuan May 18 (Pathianni) atang khian Kristian Chhungkaw Chawlhkar hmang tanin May 23 (Zirtawpni) zan thleng an hmang dawn a. Hemi chhung hian Inkhawm hun pangngai (Pathianni zing leh zan leh nilai zan) ah te thupui hmangin biak in lamah thuchah ngaihthlak a ni ang a, a bak zawng chu mahni chhungkuaah Headquaters atanga Kristian CHhungkaw chawlhkar thuzir tur buatsaih zir tur a ni ang. 

Kumin 2014 Kristian chhungkaw chawlhkar Thupui atan “Pathian ram thilpek” tih thlan a ni a. Kuminah hian chhungkuaa zir tur Lesson 4 siam a ni a, Ni Pawimawhbu ami bakah May 18, 2014 Pathian ni chawhma, zan leh May 21 Nilai zan sermon thupui siam a ni. Inkhawm loh zan apiangin in lama zir tur buatsaih hi chhungkaw tinin zir tur a ni. Assembly in a rel angin, Headquarters chuan Hemi chawlhkarah hian chhung tinin chhung Inkhawm leh zir tur buatsaih hi zir theuh turin a ngen a ni. 

May 18 zing : Kan thlen chin atang khan hma i sawn zel ang u May 18 zan : Thilpek- tisa leh Thlarau lam malsawmna May 19 zan : (Zirlai 1-na) Thilpek bul leh innghahna May 20 zan : (Zirlai 2-na) Thilpek chi hrang hrangte May 21 zan : Thawhlawm enkawl dan tha leh fel . . . . May 22 zan : (Zirlai 3-na) Kohhran thilpek rawngbawlna May 23 zan : (Zirlai 4-na) Assembly -in ke a pen leh ta.

Thuzir tur bu download duh tan, a hnuai link-ah hian download theih a ni e.

...............

ZIRLAI 1-NA.

THILPEK BUL LEH INNGHAHNA. Bible : Johana 3:16

Kumin Kristian chhungkaw chawlhkar thupui atan “Pathian ram Thilpek” thlan a ni a. Kan hotuten a ziaktu atan min ruat a, ka lawm hle. A chhan chu Pathian hnena thilpek hi malsawmna nen a inzawm tlat vang a ni. Zirlai hmasa ber atan chuan Thilpek bul leh innghahna (Theological basis of Christian giving) tiin kan tan ang. Kawng 4 in lo sawi ila.

1. Thilpek bul leh innghahna chu Pathianah a ni: Pathian chu thilsiam zawng zawngte hnena an mamawh petu a ni (Sam 24:1b). Petu mai ni lovin pe hmasa bertu, a bul leh innghahna a ni. Chu chauh chu ni lovin thilpek zawng zawnga hluber, Chhandamtu, Fapa min petu a ni (John 3:16) Kristian chhungkaw tinten kan Pathian hi petu bul ber leh pe zel theitu a ni tih i hre thar leh ang. “Pe rawh u, tichuan pekin in awm ang, tih hla siamtuin, pekah Pathian i hnehban thei lovang..” a lo tih ang khan.

2. Kan Thurin, Bible zirtirna a ni : Thuthlunghluiah chuan Pathianin a hnena thil hlan turin a mite a ngen a. Amahin a mamawh vang ni lovin, an damna tur te, malsawmna an channa tur atan te a ni (Mal.3:10). Thuthlungtharah amah Lal Isua ngeiin, “Pe rawh u, chutichuan pekin in awm ang” min ti a. Paula chuan thilpek hi, “Khawngaihna, mithianghlimte rawngbawlnaa tel ve a ni tiin a sawi (2 Kor.8:3 b). Pathian hnena thilpek hi kan phur vang leh pek tur kan neih em avang ni lovin, kan Thurin Bible in min zirtir avanga pe tur kan ni.

3. Pathian chibai bukna kipui (Main element of Christian worship) ber a ni : Bible kan enin Pathian ringtu, amah chibai buktuten thilpek an hlan thin (Gen.22:13 b) Abela thil hlanin Pathian a tilawm a, Kornelia thilpek chuan Pathian hnen a thleng tih kan hmu (Gen.4:4; Tirh.10:4) Thilpek hi chhungkaw tinten Pathian kan biak leh chibai kan bukna pawimawh tak a ni. Pathian ram thawhlawm ip (envelope) Upaten an rawn sem leh thawhlawm an lakkhawm thin te hi Pathian chibai kan bukna, maichama thil hlan a lo ni reng mai tih i hre thar ila, thilpek hmangin chhungkaw maicham mei tinung reng ang u.

4. Pathian nena inpawlna, Thlarau lam nun a ni: Bible thu hmun hrang hrang amite kan zir chuan thilpek hi Pathian leh ringtu, Pathian leh chhungkua inzawmna hlu tak a ni tih kan hria. Thilpek (thawhlawm) hi Thlarauva Pathian nena kan inpawlna, Thlarau lam thil a ni a, kan thilpek hi India pawisa mai ni lovin Thlarau nun kan lanchhuah tirna (release of spiritual elements) a ni (Johna 4:24). Heng thil tlemte kan han tarlan atangte hian Pathian hnena thilpek hi a hlu in a va pawimawh em tih i ngaihtuah zui ang u.

……………..

ZIRLAI 2-NA.

THILPEK/THILHLAN CHI HRANG HRANGTE. Bible : Leveticus 22:1-2

Bible kan en chuan Pathian hnena thilpek (leh thilhlan) chi hrang hrang kan hmu. Chipchiara ziak hman a ni lova, a tlangpui lo tarlang ila.

1. Sual/bawhchhiat thawina leh thilhlante: An hrang deuh nain kan sawi pawlh mai ang, Thuthlunghluia miten sual thawi nan leh Pathian nena inremna an neih leh theih nan hlan tur Pathianin a phut tlatte a awm. Kut ni hrang hranga thilhlan turte pawh kan hmu teuh mai. Chungte chu miin a tih loh chuan Pathian thinurna a chungah a awm dawn a, Pathian thinurna tihkianna leh a thih loh nan miin a pe ngei tur a ni (Lev. leh Num. ah te kan hmu tam hle) Kut niah te pawh Lalpa hmaah kutruakin an inlan tur a ni lo tih a ni (Lev.16:16 b).

2. Mahni duh thua thilhlan : Pathian hnena thilpek leh thilhlan zinga pawimawh tak kan hmuh leh chu mahni duhthua thilhlan a ni. Hei hi Pathian hnena lawmthu sawina atana thilpek te, miin thutiam a neih anga Pathian hnena pekte a ni. Miin Pathian hnena thutiam a neih chuan a thutiam ang chiahin a pe ngei tur a ni thung. Mahni duhthua thilhlan hi ringtu leh Pathian inthlunzawmna thuk tak a ni. Heng thilpek leh thilhlante hi chhan tlak a nih theih nan hmelhemna nei lo a ni tur a ni (Lev.22:1 b). Thuthlung hlui hunah kan awm tawh lo nain heng kan han sawi te hi keini tan pawh hriat tur pawimawh tak an ni.

3. Mi hnena thilpek : Bible-ah kan hmu a, mirethei, chanhai leh mamawhte hnena thilpek hi a ni. “Semdarh chu pun lehzualna… mi thilphal nun chu tihthauvin a awm ang” tih thute hian a tarlang a. Thufingahte kan hmu tam hle. Mite hnena thilpek hi Judaten an uar a, an pekna thinlung erawhchu Lal Isuan a pawmsak lem loh te pawh a awm tih kan hria, mahni intihropui nan hman an tum avangin. Maicham leh Temple atan chauh ni lovin mite hnena thilpek pawh hi Pathian duhzawng a ni a, Thuthlungtharah pawh kan hmu zel a ni (2 Kor 9:1b).

4. Sawma pakhat: Sawma pakhat hi Thuthlunghluiah khauh takin kan hmu a, Thuthlung tharah paihna kan hmu lo. Pathianin Israelte hnenah sawma pakhat a hauhva, a ngai pawimawh hle. Sawma pakhat hi Pathianin “ka ta” a ti a, miin a pek loh chuan “mi ruksak” a ti a ni. Sawma pakhat hi thilpek dang nen ngaihfin tur a ni lo. Kan phal emaw, kan phal lo emaw sawma pakhat hi chu pek tur a ni, rukru kan nih loh nan leh Pathian ram zau nan. Sawma pakhat hi chu a dan a dang a, kan duh dan ang anga tih chi pawh a ni lo, Kohhranah ngei pek tur a ni (Mal.3:10). Thilpe theia chhungkua kan la awm te hi lawm ila, Lalpa leh a ram zau nan i pe zel ang.

5. Mahni leh hun: Thuthlung hlui leh Bible lam atang ni lovin keimahni lam lo in thlir ta ila. Thilpek kan tih hian sumpai leh thilneihte kan rilruah a lian a, a bik takin malsawmna kan dawn pawisa lam a ni deuh ber. Amaherawhchu Pathian leh Kohhran, Pathian ram zau nan keimahni, kan taksa leh rilru kan hun tha laite eng anginnge kan pek thin le. Pawisa, thawhlawm leh thildang kan pe a, mahni leh kan hun tha te i pe phal ang u.

…………

ZIRLAI 3-NA

KOHHRAN THILPEK RAWNGBAWLNA. Bible: II Korinth 8:9

Kan Kohhran thilpek rawngbawlna chungchang hi chhungtinten kan hriat chian a tul a, kan sawi chipchiar thei dawn lova, kawng hnihin lo sawi ila.

A: Pathian ram sum thliarfel dan : Kum 2010 atang khan Assembly chuan Pathian ram thawhlawm hetiang hian a thliar a.

1. Kohhran sum pui : Baptist Kohhran in kan thawhlawm zawng zawnga kipui ber a ni. Tualchhung Kohhran Thawhlawm a PRZ leh RT head pahnih te hi an ni a, hei hi Tualchhung sum a ni lova, BCM pumpui rawngbawlna leh thawktu zawng zawng leh Mission lama kan rawngbawlna enkawlna a ni. PRZ leh RT te hi Headquarters a lut a ni a, Kohhran tul zawng zawng atana hman a ni. Kohhran thenkhat RT (Ramthim head) nei lo kan awm a, a tha lo, Kohhran tinin PRZ leh RT head hi neih ngei tur a ni a, chhungtinte pawhin hei hi kan chian a tha hle. Hetah hian sawma pakhat dah tur a ni.

2. Ramthim pual (Mission Fund) : Assembly chuan PRZ leh RT head a mite bakah Ramthim rawngbawlna pual atan Mission Fund a nei a, Buhfaitham leh Missionary support atanga lo lut te hi a ni. Buhfaitham hi BKHP-ten an enkawl a, mahse BKHP sum a ni lo, Tualchhung Kohhran sum pawh a ni lo, Pathian ram zauna, hmunpui chan a ni a, Headquarters a chhunluh bawk a ni. Missionary chawmna (Support Fund) hi Kohhran mi te, mimal, pawlho, Tualchhung Kohhrante thahnemngaihna atanga Assembly-in hmuh a beisei (Faith project) a ni. Buhfaitham leh Missionary chawmna kan nei hi a vanneihthlak em em a ni. Kum 2012-13 liam ta hian Buhfaitham atangin Rs 34,895,771.00 zet kan hmu. Tun Financial year liam taah khan Missionary support atanga hmuh kan beisei zat chu Rs 14,000,000.00 zet a ni.

3. Tualchhung Kohhran sum : Kum 2010 Assembly khan Tualchhung atana hman tur thawhlawm hrang hrang- Tualchhung, Building, Relief, Kristmas etc, etc. te hi Pathian ram sum vek a ni, a ti thar leh a. Heng kan han sawi tak head amite bakah Pathianni thawhlawm te pawh hi Tualchhung chan a ni a, Pathian ram thawhlawm vek a ni. Assembly chuan Kohhran sumpui leh Mission Fund ah chauh ni lovin, Tualchhung Kohhran pawh rethei lo turin a duh a ni. Hei hi Kohhran mi, chhungkaw tinten kan hriat a pawimawh hle. Thawhlawm ka zir chianna atanga lo lang chu Tualchhung Kohhran thenkhat Tualchhung sum te, Biak In sakna (Building) te nei lo an awm a, an duh hun hunah PRZ leh RT head amite an hmang mai a ni awm e. Hei hi a tha lova, kan Assembly leh Rules in min duh dan ang chiahin thawhlawm pawh kan lakhawm ang a, kan enkawl tur a ni. Hei hi chhungkuate pawhin kan chian a tul ve hle.

B. Budget leh Target :

1. Kum tinin Assembly in Budget a siam thin a, chumi atang chuan Department (Medical, R & D etc) te thawhchhuah tur te, Missionary support leh kawng dang dang atanga hmuh turte paihin a bak zawng Kohhran thawhchhuah turin Target ah a sem thin a ni. Kumina kan Budget pumpui chu Rs 559,725,300/- a ni a, Department thawhchhuah tur leh kawng dang atanga hmuh beisei chu Rs 207,673,400.00 a ni. Department te thawh chhuah tur hi a tam ve em thin avangin kan tlin lo fova, hemi avang hian Kohhranhoten kan Target kan khum a lo ngai ta thin a ni. Tin Target hi kan in tuk chin sang ber (maximum ceiling) ni lovin a hniam lam bituk (minimum ceiling) a ni. BCM pumpui tha taka kan kal zel theih nan chhungkaw tinin PRZ leh RT head hi kan ngai pawimawh ber tur a ni a, chutih rualin tualchhung Kohhran pawh rethei lo turin chhungtinten Pathian ram thawhlawm kan pek dan kan relfel a ngai hle.

2. Pathian ram thilpek enkawl: Chhungkua hi Kohhran te zawk tih a ni thin a, Pathian ram thawhlawm dik leh fel taka enkawl hi Kohhran than leh hmasawn nan te, kan punna leh thlarau lam thanlenna atan te a pawimawh khawp mai Pathian ram sum enkawl fel lohna-ah chuan Kohhran a thang thei lova, Kohhran leh chhungkuate pawh min nghawng thin a ni.

………………

ZIRLAI 4-NA

ASSEMBLY IN KE A PEN LEH TA. Bible : Matthaia 10: 7 - 8

Assembly kan zova, kumin chu lawmna tur kan nei leh ta. Kan Kohhran rorelna lian ber chuan Ramthim lamah hmathar la turin ke a pen ve leh ta a ni. Arakan (Myanmar) lam kan hawi dawn a, Jharkhan Mission chu Field puitlingah hawn kan tum bawk. Lalpan kan hmabakah min hruai zel a, hemi avang hian Thilpekah Kohhran chhungtin te kan insan mar lehzual a ngai dawn. Kan Ramthim rawngbawlna Lalpan mal a sawm thin a, nikum khan ringthar 5000 chuang zet kan nei a, a lawmawm hle. Assembly in ke a pen a, chhungtinten kan zui a ngai, engtinnge kan zui ang.

1. ‘Note’ lian zawk nen : Lalpan min khawngaih a, nangni leh keini chhungkua hi thilpek hmanga rawngbawlna hun min la pe, a lawmawm hle. Assembly hmathar lak dan te ngaihtuahin thla tinin nikum lam aia ‘Note’ lian zawk kan phawrh zel dawn lawm ni ? Nang leh kei hi Missionary kan ni lo, mahse theihna kan nei, thilpeka rawngbawl turin Lalpan min ko.

2. Rinna in: Sawma pakhat leh thawhlawm te kan sawi a, tun May thla hi sum tam zawk kan neih thla a ni kher lo mai thei..,mahse rinna in ke kan pen thei. “Rinain an kal zel, ram te an la kir an rel lo”, tih hla ang khan. Pathian chakna rinchhanin tun thla atang chuan.. Lalpan “Engzatahnge min rin ngam ve dawn,” a ti che. Kan thlen chin atangin hma i sawn zel ang (Phil.3:16).

3. Target a pung.:Thlarau lam ration a ni : Kumin chu kan Target a pung nasa hle, mahse heti hian ti teh ang. Thlarau lam ration a ni. Kumin hi Baptist Kohhranhote kan Target a pung a, Lalpan malsawmna tam zawk tawng buaktir min tum kum a ni. Pe rawh u, chutichuan pekin in awm ang, titu hi i ring ngam ang u. Tunlaia chhungtinten tihbo kan hlauh em em (thingtlangah phei chuan a ni zual awm e) chu Job card a ni. India sawrkar siam Job card kan nei a, hemi aia pawimawh lehzual van malsawmna kan dawnna atan Pathian ram thawhlawm ip (Van lam Job card) kan nei bawk. Malsawm thuah hnih kan dawnna atan kan Job card te hi i hmang tangkai ang. Job Card pakhat a dawnna, Job Card 2-na dawn zelna tura pekchhuahna.

4. Thilpek chu zawng ka ni lo :Paula hian thilpek chungchang a sawi nasa hle. Nasa taka sawi chung siin Philipi Kohhranho hnenah chuan, “Thilpek chu zawng ka ni lo, rah nangmahni lama pung tur chu zawng ka ni zawk e,” a ti (Phil.4:17). Hla siamtuin, “Thil petu, i thilpek ni lovin… Thilpetu nangmah zawk ka duh che, a ti ang hian Lalpa hnenah chhungkuate inkawltir ang. Engkim neitu hnenah inpe thar ila, Lalpa malsawmna kan dawn belh zel theih nan tam lehzualin i pe phawt ang u.