May 29, 2025 (Ningani) hi Mizoram Baptist Kohhran Ni pawimawh (Special Day) “ṬKP Ramthim Ni”a ni a. Kumin ṬKP Ramthim Ni thupui chu “I thuin lente ka deng leh ang e”( Luka 5 : 5)” tih a ni. ṬKP Ramthim Ni-ah hian MṬKP atanga ruahmanna an siam zul zuiin Unit tinah inkhawm leh ţawngţai programme te siamin, urhsun takin hun an hmang ang, Mission rawngbawlna lama ţhalaite cho thar leh nan te, Missionary-te puala ţawngţai leh ţawngţai programme te siamin hun hman ţhin a ni.
Kumin ṬKP Ramthim Ni-ah pawh MṬKP lam aţangin ţawngţai subject siam a ni a, ṬKP Ramthim Ni puala ţawngţaina hmang ţheuh turin MṬKP chuan Unit tina ṬKP member te leh Kohhran mite a chah a ni.
MṬKP hruaitute (Office bearers leh Executive Committee Member (ECM) te pawh hemi ni hmanpui hian ṬKP Unit hrang hrangah hetiang hian an fehchuak ang.
ṬKP RAMTHIM NI LO PIAN CHUAH DAN
ṬKP hian din a nih tirh atangin Ramthim veina lian tak a neih avangin Ramthim rawngbawlna lamah pawh hma a la hma hle a. District ṬKP Inkhawmpui hmasa ber, Oct 21-23, 1955 (Pukpui)-ah chuan Agenda “ṬKP hminga Thuhriltu tirh” tih hi ngaihtuah a ni. Inkhawmpui vawi hnihna 1956 (Hnahchang)-ah pawh “Tuikuk Takam pual bik neih” tih rel a ni leh a. Mahni remchan angin Tuikuk-Takam pual hian hun an lo hmang ţhin a, thawhlawm an lakkhawm pawh Ramthim puala hman atan Headquarters-ah chhunluh ţhin a ni.
1959-ah chuan ‘District ṬKP Tuikuk-Takam Ni’ atan October 5 (Thawhtan ni) hman nise tih a ni a, 1960-ah chuan September thla Thawhţan ni hnuhnung ber hman nise tiin a rel leh a, chumi kum chuan September thla thawhţan ni hnuhnung ber chu September 26 a ni. September 26 hi hun rei tak chhung chu Ramthim Ni atan hman zui a ni ta a ni. “Tuikuk-Takam Ni” tih chu huap zim deuhva hriat a nih avangin 1969-ah chuan ‘Ramthim ni’ tiin thlak a ni.
Amaherawh chu September thla hi Beirual thla a nih avangin ṬKP tana Ramthim ni hman hi a remchang tawk lo deuh ţhin a. Kum 2006 MṬKP (S.Vanlaiphai) Rorelna chuan May thlaah sawn nise tiin a pawm a. ṬKP Ramthimni atan a ruat fel ta a. Kum 2007 aţang chuan ṬKP Ramthim Ni hi May 29-ah hman a ni ta a ni. ṬKP Ramthim Ni-ah hian Unit tinah inkhawm buatsaihin, thawhlawm pawh Headquarters-ah lutin Mission rawngbawlna atan hman ţhin a ni.
