May 22, 2025 (Ningani), chawhma 11:00 khân, JH Lorrain Hall, Baptist House Lawngtlai Bazar vengah, Lawngtlai Area Ṭhalai Kristian Pawl Co-ordination Committee hruaitute’n Lawngtlai Area chhûnga ṬKP member – zirnaa hlawhtlingte châwimâwina hun an hmang a, LAṬKP Vice Chairman Rbt. Rohluzuala Chhakchhuak-in hun a kaihruai.

LAṬKP Co-ordination Committee-in Lawngtlai Area chhûnga ṬKP member zirnaa hlawhtlingte châwimâwina a pêkte chu hêngte hi an ni –

1) Lalrinchhani (Mizoram Civil Service), Bazar Unit (Lawngtlai East Pastor Bial)

2) VLMS Dawngliana Sailo (Mizoram Engineering Service), Peniel Unit, Sangau (Phawngpui North Pastor Bial)

3) VL Ruatpuii (Doctor of Philosophy), Bazar Unit (Lawngtlai East Pastor Bial)

4) Isak Lalmalsawma (HSSLC Top-6 Commerce Stream), Ṭawipui South Unit (Tawipui Pastor Bial)

Hlawhtlinna chang châwimâwite hian thu sawina hun tâwi an hmang ṭheuh a, Rev. Dr Lalzarliana, Executive Secretary Lawngtlai Area-in lawmpuina leh fuihna thu sawiin, Rev. Tc. Vanlalmalsawma, Lawngtlai East Bialtu Pastor-in ṭawngṭaiin hun a khar a ni.

LAṬKP Co-ordination Committee hian zirnaa hlawhtlingte châwimâwi hi heti ang hian a kalpui ṭhin a – HSLC leh HSSLC stream tina Board exam-a top 10-a lang chinte, Doctoral (PhD) degree hmûte leh Central/State/District Council hnuaia hna nghet, gazetted post-a tling chinte pualin châwimâwina hun hi a buatsaih ṭhin a ni.