October 14, 2023 (Inrinni) nileng khan Communications Department buatsaih-in Aizawl khawpui chhunga Pastor Bial leh Tualchhung Kohhran Chanchinbu leh Media Cell enkawltu te pualin “Kristian Communications Worskshop”, BCM Central Church, Upper Republic, Aizawl ah neih a ni a. Chawhma lamah Rev. R. Lalnunzira, AGS (Service) hnen atangin keynote address (workshop buatsaih a nih chhan leh a tum te) ngaihthlak a nih bak ah Upa KMS Dawngliana, Manager, BLS hnen atangin 'Kohhran chanchinbu kalphung leh chanchinbu dang nena a inanlohna' tih hmangin zirtirna ngaihthlak a ni a, sawihona hun hi Rev. Dr. F. Lalsangliana editor Baptist Today & Kohhran beng in a kaihruai.
Chawhnu lam ah hi hun hnih ah then a ni a, hun khatna ah 'Chanchin thehdarhtute mawhurhna leh inghahna (Principles of Journalism)' Dr. Irene Lalruatkimi, Professor, MZU hnen atanga ngaihthlak a ni a, sawihona C. Lalhmachhuana, Manager, Audio Visual Production in a kaihruai a. Hun hnihn ah 'Cyber crime leh a kaihhnawih- chanchin thehdarhtu te tana fimkhurna tur' Pu Zonunsanga, Addl. SP, CID (Crime) Aizawl hnen atanga zirtirna ngaihthlak a ni a, sawihona Rev. H. Ramthianghlima, Asst. Prof. AICS in a kaihruai. Tun tum workshop ah hian Aizawl khawpui chhung tualchhung leh bial hrang hrang atangin mi 85 an kalkhawm a ni. Kristian Communications workshop hi Lawngtlai ah November ni 4, leh Lunglei ah November ni 11 ah te buatsaih a ni leh ang.
