August 12, 2023(Inrinni) khan Mizoram Ṭhalai Kristian Pawl Executive Committee Meeting Vawi 543-na chu BCM Lunglawn Committee Hall-ah neih a ni a. Thu pawimawh tam tak relin, kum 2024 ṬKP Ramthimni leh ṬKP Day thupui pawh thlan fel a ni.
Meeting hi Upa R. Lalrochama, President MṬKP chuan kaihruaiin, MṬKP Secretary Rev. F.Zorinkhuma`n MṬKP rorel bawhzuina leh hmalakna hrang hrang report a pe a. Report kim chang hi rorel member te hnenah ziaka sem a ni.
MṬKP Treasurer Nl. J.Lalrintluangi chuan sum hman dan ziakin report a pe a, Tv. Lalruatkima, Fin.Secretary MṬKP pawhin sum hmuh dan ziakin report a pe bawk. Report aṭanga a lan danin tunah hian Pastor Bial 92 zingah Bial 45-in MṬKP target an pe tlak tawh a, Bial 47-in an la pe lo a ni. ṬKP Ramthimni thawhlawm pe lut tawh Bial 44 awmin bial 48-in an la thehlut lo a, ṬKP Day thawhlawm thehlut tawh bial 13 awmin bial 79-in an la thehlut lo bawk. Heng bakah hian MṬKP Inkhawmpui dawltu ṭanpuina, Youth Centre Pual Fehchhuahna leh Raltlan ṭanpuina puala vawikhat Inkhawm thawhlawm pek tur la pe lo Bial tam zawk an la awm thu report ah hian tarlan a ni.
Meeting chuan kum 2024 ṬKP Ramthimni thupui atana ‘Krista hmangaihna chuan min tir lui a ni’ (II Kor 5:13-15) tih a thlang a, ṬKP Day thupui atan ‘I Pathian tawk turin inpeih rawh’ (Amosa 4:12) tih a thlang bawk.
Thu pawimawh tam tak an rel zingah, Kum 2028 MṬKP Inkhawmpui dawltu tur chung chang te, National Baptist Youth Conference October 19–22, 2023-a neih tur chungchang te, Mizoramah Rorelna dik a awm theih nana hmalak zel dan tur te, Bial leh Unit hrang hrang aṭanga sawmna an dawn te, APBY 2024 Conference, Malaysia-a neih tur chung chang te a tel a, MṬKP Youth Centre Development Committee din a ni bawk.
