Chibai ule:
[caption id="attachment_6019" align="alignright" width="300"]
Rev.H.Lianngaia, General Secretary[/caption]
Pathian hruainain kum 2015 kan lo chuangkai leh ta. Mizoram Baptist Kohhran member zawng zawng, Chhungkua zawng zawng leh Tualchhung Kohhran zawng zawngte kan Lalpa leh Chhandamtu Isua Krista hmingin chibai ka buk a che u. He kum thar hian Pathian malsawmna tam tak thlen che u sela, chu malsawmna chuan kawng tin renga hmasawnna thlen che u rawh se.
In dam tlang alawm maw ?
Mi thenkhatin “General Secretary i nihna atang hian eng nge i ngaih pawimawh (priority) ber?”, tiin min zawt thin a. Ka chhunna chu “Pathian ngaih pawimawh ber chu ka ngaih pawimawh ber tur a ni”, tih hi a ni a. “Pathianin a ngaih pawimawh (priority) ber chu eng nge ni ? Mission, Church expansion, AICS/HATIM/Damdawi In,etc em ni? Ni lo, “Mihring” (person) a ni. Kohhran hi Isua Krista ringtu mimal leh chhungkua (mihring or person) eng emaw zatin a siam a ni a, chuvang chuan Pathian Kohhran hi ka priority nghet tak chu a ni tih hi ka chhunna chu a ni. Khing kan han tarlante leh kan tarlan bakte pawh Kohhran rawngbawlna pawimawh tak takte an ni a, chung rawngbawlna thawk chhuaktu chu Kohhran mite kan ni. Hna aiin a thawktu hi kan pawimawh hmasak zawk avangin Kohhran mite hna thawka rawngbawl thei tura kan dam tlan hi i ngai pawimawh hmasa ber ang u.
Rev. Dr. Rick Warren (USA,California State-a, Saddleback Baptist Church Pastor) chuan “Kohhran than zelna tur hi Committee agendaa neih a ngai lo, Pathian Nung Kohhran a nih avangin a thang zel dawn. Amaherawhchu a thanna daltu hi a awm thin a, chu thil tih bo chu kan agenda tur chu a ni”, a ti. Kohhranho inlungrual lohna te, lungawi tlan lohna te, tan lam leh huat lam neih te, inti hotu leh lal bik awm te, induhsakna kairual lo te, political party boruak te etc hian kohhran min tidam lo fo thin. Kum 2015 chhung hian Kohhran mite dam tlanna hi kan ngaih pawimawh nise. Member te inngaihsaktawna, induhsaktawn leh inchawimawitawnte hi dam tlanna atan an tangkai a, kan target tlin ngei ngei tur ni tel rawh se.
Thahnem i ngai ang u:
“Pathian ngaiha thaa inentir turin thahnem ngai rawh”(2 Tim 2:15(b). January ni 1, 2015 zing inkhawmah Kohhran pakhatah chuan he thupui hmang hian kum thar thuchah ka sawi a. Thahnemngaihna tih hi kan ram mipui tana kum thar thuchah ka dawn niin ka hria. Thahnemngaihna hian hlawhtlinnaah min hruai a ni. Hlawhtlinna chuan hmasawnna sang takah min vawrh chho dawn bawk a. Zirlai (Sikul naupang), sumdawng, kut hnathawktu, contractor, office kal mi, ram hruaitu leh kohhrana rawngbawl hna hum vuantu zawng zawngte kum thar 2015-ah hian kan hna leh tih tur theuhte thahnemngai taka hmachhawn turin kan insawm a ni.
Thahnemngaihna chuan mimal nunah hlawhtlinna ropui tak min thlen ang a; chhungkaw khawsaknaah intodelh leh hmasawnna min thlen bawk ang a; Kohhran leh kan rawngbawlnaah nasa takin hlawhtlinna hmel kan hmuh bakah Pathian ram pawh a zau zel ang a; kan ram leh kan khawtlang nun pawh a lo mawi zual zel duwn a ni.
Pathian leh Kohhrante duhsaknain BCM-ah hian Puipa chan changin kum 10 dawn chu ka lo awm ve ta reng mai. Min duhsaktu Pathian leh Kohhranhote leh ka rawngbawlpui zawng zawngte hnenah lawmthu ka sawi duh bawk a. ka term la hman zawh loh kum 1 leh thla 3 la awm tur atan min tawngtaisak chhunzawm zel turin ka ngen nghal bawk che u a ni.
