November 4, 2023 (Inrinni) nileng khan Communications Department buatsaih-in Lawngtlai khawpui leh a chhehvel-a Pastor Bial leh Tualchhung Kohhran Chanchinbu leh Media Cell enkawltu te pualin “Kristian Communications Worskshop”, BCM Nazareth, Councilveng, Lawngtlai-ah neih a ni a. He hunah hian Resource person te nen mi 65 zet an kalkhawm a ni.
Hun hmasa lamah C. Lalhmachhuana, Manager, BCM Audio Visual Production-in kaihruaiin tanna leh hunserh a hman zawhah Rev. Lalnunzira, AGS Serice-in thupui sawihawnna - keynote address neiin, workshop buatsaih a nih chhan leh a tum te a sawifiah a. Hemi zawh hian ‘Kohhran Chanchinbu leh media kal tlanga rawngbawlna ten engtin nge hma a sawn zel theih ang’, tih thupui zirhona neih zui niin, Rev. Dr. Lalzarliana, Director, Communications Dept. in zirtirna a nei a. Rev. Dr. F. Lalsangliana Editor Baptist Today & Kohhran beng kaihhruaina-in sawihona neih zui a ni.
Chawhnu lam hi hun hnih ah then a ni a, hun khatna Rbt. B. Lalchungnunga, Chairman, Lawngtlai Area Media Committee-in a kaihruai a. Rev. Lalzarliana Khiangte-in ‘Kristian Communications inghahna’ tih thupui hmangin zirtirna a pe a. Sawihona neih a nih hnu-ah ‘Chanchin thehdarhtute mawhphurhna’ (Principles of Journalism) tih thupui Dr. Irene Lalruatkimi, MZU ziak leh ‘Kohhran Chanchinbu kalphung leh Chanchinbu dang te nen a danglamna’ tih Upa KMS Dawngliana ziak te zirhona neih leh a ni. He hun hi Tv. C. Lalhamchhuana’n kaihruaiin sawizauna leh sawihona tha tak neih chhunzawm a ni bawk.
