July 14-16, 2023 chhung khan Lawngtlai Area huamchhunga Bial Zaipawl te pualin intawhkhawmna (Bial Zaipawl Meet) BCM Biak In - Lawngtlai Vengpuiah neih a ni a. Thupuiah "Lalpa lawm tlak, Rawngbawlna" tih hman a ni.
He Meet-ah hian Rev. Lalzarliana Khiangte, Lawngtlai East Bialtu, Rev. Lalbiakhlua Chawngthu, Lawngtlai North Bialtu, Rev. K. Laldosanga, Lawngtlai South Bialtu leh Rev. Dr H. Lalthlamuana, Executive Secretary Lawngtlai te Speaker an ni a, Lawngtlai Area huam chhuang Zaipawl leh Mimal zaithiam tak tak te leh BCM Choir ten fakna hla sa-in rawngbawlna an nei thin bawk.
Bial Zaipawl Meet ah hian Pathin Biak inkhawm bak ah Inrinni chhunah Bial zaipawl conductor-te pualin conductor training neih a ni a, Rbt. Pc. Lalchunglura, Conductor, BCM Choir-in zirtirna pe-in hun a hmang a ni.
Lawngtlai Area Bial Zaipawl Meet neih zawh tak ah hian, Pathianni zan inkhawm-ah Lawngtlai Area Baptist Choir Music Video panga Rev. Dr. H. Lalthlamuana, Executive Secretry-in a tlangzarh nghal a. Music Video te hi – ‘Chhandamtu Lal Isua’, ‘I Chawimawi ang u’, ‘Ka tan hian a va hlui em’, ‘Thinlungin ka fak ang che’, ‘A lo kal thuai dawn e’, tih hla te an ni.
