August 2-4 (Zirtawp zan atanga Pathianni zan) hmang khan Mission Department ruahmanna-in Mission Inkhawmpui thawh hnihna chu Theiriat Bial, Lunglawn Bial leh Chanmari Bial te infinin BCM Biak In, Salem, Lunglei-ah neih a ni. Inkhawmpui thupui ah “Ram lak tur lah chu a la tam mai si a” (Josua 13:1) tih thu hman a ni a, Speaker Rev. Dr. R. Lalthanmawia, AGS Mission, Rev. R. Lalnunzira, AGS Service leh Rev. Lalremsiama Ralte, Mission Director te hman an ni a, Mission Focus & Discussion hruaitu atan Pu T. Ngahksanga, Mission Promoter hman a ni bawk.
Zirtawp zanah Inkhawmpui hi tan-in Rev. Lalremsiama Ralte, Mission Director-in thuchah a sawi a, Inrinni zanah Dr. R. Lalthanmawia, AGS Mission-in thuchah sawiin, Pathianni zingah Rev. R. Lalnunzira, AGS-Service in thuchah a sawi a, Pathianni zanah Rev. Dr. R. Lalthanmawia’n thuchah sawiin Inkhawmpui a khar a ni. Inkhawm apiangin BCM Choir te, Bial Zaipawl te leh Tualchhung Kohhran Zaipawl te rawngbawlna ngaihthlak a ni a, pathianni chawhnu-ah Pu T. Ngahksanga, Mission Promoter kaihhruaina-in Mission Focus leh Mission Challange neih a ni bawk.
Mision Inkhawmpui hi tunkar tawp August 9-11 hmang hian Zotlang Bial leh Serkawn Pastor bial huapin BCM Biak In, Serkawn-ah neih a ni ang a, hemi hun chhung tho hian Rahsiveng Bial, Electric Bial leh Bazar Bial te huapin BCM Biak In, Rahsiveng-ah neih a ni bawk ang.
Mission Inkhawmpui-ah hian inkhawm apiangin thawhlawm lakkhawm thin a ni a, hei hi Zochachhuah-a Biak In sakna atan hman turin ruahman a ni.
