MBKHP Inkhawmpui 2024 dawltu tur Lungsen Pastor Bial chu Pandal Sak tan turin ruahmanna an siam mek a. Pandal Structure phurtu lirthei te kawng lakah a chhiat avangin tum hunah pandal sak tan hna hi thawh theih a ni ta lo a ni. December 5, 2023 (Thawhlehni) khan Lungsen Pastor Bial BMP te chuan pandal sakna tur hmun leh a vel te sam fai hnatlang thawkin, member thahnem tak an thawk chhuak a ni.
Hnatlang bul tan ni-ah hian hna thawh hma-in Pandal hmun Pathian hnena hlanna neih a ni a, Rev. C Lalremmawia Bialtu Pastor-in hun hmangin tawngtairualna neih a ni a, Bial leh Unit BKHP hruaitu engemawzat-in an tawiawm bawk.
Pandal hi LGSA Playground ah sak tur niin, a dung 144ft leh a vang 130ft tura ruahman a ni. MBKHP Inkhawmpui Organising Committee ruahmanna-in Pandal sak hna hi Bial BMP leh TKP ten an thawk leh ang a, Bial huapa hnatlang neih bakah Committee peng hrang hrang ten an hmazawn theuh thawkin ngawrh takah thawh chhoh an tum a ni.
Lungsen Pastor Bial-ah hian 1980, 1993 ah te MBKHP Inkhawmpui nghah a lo ni tawh a, tun hi tum thumna tur niin, Bial huapin inbuatsaihna kawng hrang hrang an kalpui mek a ni.
MBKHP Inkhawmpui hi February 15 -18, 2024 ah, Lungsen Pastor Bial, Lungsenah neih tura ruahmana a ni a, thupui-ah "Tho la, i Pathian ko rawh" (Jona 1:6) tih niin, Speaker atan Rev. K. Lalnunsanga, Bialtu pastor Aizawl Central Bial thlan fel a ni tawh bawk.
