Manipur State a buaina avanga tuarna nasa tak thleng mekah hian Mizoram Baptist Kohhran chuan hetiang hian thuchhuah a siam a ni:
BAPTIST CHURCH OF MIZORAM
Headquarters: Serkawn, Lunglei
Manipur State buaina chungchanga
Mizoram Baptist Kohhran Thuchhuah
- Manipur State a rawng taka inthahna thleng mek leh, chenna in leh lo intihchhiat saka, in hal sak te, nu nau pawisawi lote sawisak a, thlabara insiam hi Pathian thu nen a inrem loh avangin hetiang ti tute hi Mizoram Baptist Kohhran chuan a dem tak zet a ni.
- Sakhaw hmun serh intihbawrhbansak leh inhalsak te hi India ram Secular State a thil thleng atana thil tihawm loh anih bakah India Danpui kalh tlat a ni a, hetianga Sakhaw hmun serh intihbawrhbansak hi Mizoram Baptist Kohhran chuan a dem tak zet a ni.
- Nunna chan ta chhungte, in leh lo chan ta te leh sahimna atana raltlan zawng zawngte Mizoram Baptist Kohhran chuan a khawngaihin a tuarpui em em a, Pathian thlamuanna leh awmpuina an chungah thleng se a duh a; Mizoram Baptist Kohhran hian a tanpui theih ang angin a lo tanpui ve tawh a, tanpui zel pawh kan tih turah kan ngai.
- Manipur State-ah hian rorelna dik, Pathian duh zawng anga rorelna thleng se tih hi Mizoram Baptist Kohhran duh dan a ni.
Sd/- REV.DR.R.LALTHANMAWIA
AGS (Mission)
For General Secretary
Baptist Church of Mizoram
Download : BCM Press Release(PDF)
..........
Mizoram Baptist Kohhran chuan Manipur State buaina chungchanga thuchhuah hi July 9, 2023 (Pathianni) zing inkhawma lo chhiar chhuak tur leh Mizoram Kohhran Hruaitu Committee (MKHC) leh North East India Christian Council (NEICC) pawhin Kohhrante a ngen angin July 9 Pathianni zing Inkhawmah manipur ram tana tawngtai rualna nei turin Tualchhung Kohhran tinah ngenna a siam nghal a ni.
Kohhran hote tawngtai rualna tur thupui:
- Manipur State a chi leh chi inkara buaina chhuak a lo reh theihna turin.
- Buaina avanga nunna chan chhungte tan leh in leh lo chan ta zawng zawngte tan.
- Sakhaw hmun thianghlimte zah lo tak leh pawisa lo taka tih chhiat leh tih bawrhban a ni a, hetiang thil hi a thlen nawn zel tawh loh nan.
- India ram leh Manipur State a roreltuten rorelna dik an ken kawh theih nan.
- India Sawrkarin Uniform Civil Code (UCC) hmang turin hma a la mek a. He dan hi hnam inpumkhatna ti chhe thei, hnam tlem zawk leh sakhaw tlem zawkte nek chepna leh inchim ralna a nih dawn avangin tih puitlin a nih lohna turin (Hei hi MKHC atanga ngenna a ni).
