Thawhlehni, May 2, 2023 hi Baptist Kohhran Hmeichhe Pawl (BKHP) din champha phak vawi 85-na a ni a. He Ni hi BKHP Unit tinah hman a ni ang. Inkhawm Programme pawh Bial leh Unit ten tul leh tha an tih angin an hmang dawn a ni.

MBKHP chuan he Ni hi Khawtlang tana mi tangkai ni tura inzirtirna leh thiltha tih nana hmang uar turin BKHP Unit te a chahin ngenna a siam a.Unit tam takah chuan BKHP Day-ah hian MBKHP-in a duh dan zulzui in zingkarah mahni awmna veng leh a chhehvel tifaia hnatlang nei tura ruahmanna siam a ni, Bial thenkhat chuan bial huapa hmang turin ruahmanna an siam a, Bial leh Unit anga Ruai nena hman tum pawh an awm bawk. MBKHP hruaitute pawh Unit hrang hrangah sawmna an hmuh angin BKHP Day hmanpui hian an kal dawn a ni.

BKHP lo pian chhuah dân.

Baptist Kohhran Hmeichhe Pâwl hi Kohhran chhunga Pâwl (Fellowshi) din hmasak ber niin, thlarau lam rawngbâwlna-ah pawh kohhran hnuk leh chelh mar tlattu pâwl tangkai tak a ni. Kum 1938 March thlaah BMS Missionary Pi Zirtiri (EM Chapman) hovin Girls Auxiliary (GA) Assembly hriatpuina leh kaihhruainaa din a ni a. Hruaitu hmasate chu hêngte hi an ni.
Nl.Thenvungi - President
Nl. Laltinthangi - Secretary
Nl. Nûchhûngi - Treasurer

Girls Auxiliary (GA) hian nula chauh a huam a, chhungkaw tanpui ngaite tanpui chu an tum ber pakhat a ni. Kum 1947-ah Nû Pâwl din a lo ni leh ta a. Chutianga hmeichhe zînga pâwl pahnih lo ding ta chu Assembly hotute chuan fel tawk lova hriain, pâwl pahnihte chu pâwl khatah dahin March 20, 1965-ah chuan BKHP din a lo ni ta a. He pâwl hian Baptist Kohhrana hmeichhia zawng zawng, kum 14 chung lam, a duh apiang chu a huap vek a ni.

Kum 23 chhûng zet chu March ni 20 hi BKHP Day atan hman thin a ni a. Hei hi MBKHP Executive Committee-in ngun taka a ngaihtuah that hnuah, “Mizoram Baptist Kohhran hmeichhe rawngbawlna awmze neia a din chhuahna chu May 2, 1938 hi a ni e,” tiin BKHP Day atâna hman zâwk turin Assembly General Committee-ah a thlen a. A thlen ang hian rem tihsak niin kum 1990 atang chuan ram pûmah BKHP Day chu May ni 2 ah hman a lo ni ta a ni.

MBKHP hian thutiam, din chhan, thil tum leh inkaihhruaina fel tak a nei a. BCM Assembly rorêlna hnuaia awm a nih angin BCM Constitution & Rules leh Assembly rorêlte kalh lovin thil a ti thin a ni.
Mizoram Baptist Kohhran inchhiarna thar ber, Statistical HandBook 2022-2023 in a tarlan dan in BKHP hi Mizoram leh Mizoram pawn hmun hrang hrang Pastor Bial 92-ah Unit 457 din a ni tawh a, member 33,364 an awm mek a ni.