Tunkar Pathianni, May 23 hi Thlarau Thianghlim thlen ni (Pentecost Ni) a ni a. He Ni hi khawvel pumah Kristian te chuan urhsun takin an hmang thin a. Mizoram Baptist Kohhran pawhin he ni hi Special Sunday atan a hmang thin a ni. Kumina Thlarau Thianghlim thlen Ni atan thupui hranpa siam a ni lo va, Tualchhung Kohhran ten tha an tih angina thupui an duh zawng an hman tura tih a ni.
Hetihlai hian Covid-19 hri leng avangin rampumah a huhova thiltih leh punkhawm khap a ni a. Kohhran te pawh hun rei tak Biak Inah inkhawm leh thiltih ho a theih loh avangin Thlrau Thianghlim Thlen Ni (Pentecost Ni)-ah pawh Inkhawm theih a ni dawn lo a. Amaherawhchu, Headquarters atanga tawngtai subject duan sa te hmanga tawngtaina hmang theuh tur leh hemi ni hi hlawk taka Pathian pawlna hun hmang theuh turin Headquarters chuan Kohhran memberte a chah a ni.
..............
Tirhkohte thiltih bua kan hmuh angin Pentikos ni a zirtirte hnena Thlarau Thianghlim a lo thlen ni atang khan chanchin tha hrilh rawngbawlna chu a lo intan tak tak ta a. Huaisentakin Tirhkohte chuan Krosa an khenbeh Lal Isua chu Pathian Fapa Krista ngei a nihzia auchhuahpuiin Thlarau Thianghlim hruaina hnuaiah Judai ram leh Jentile te zingah chanchin tha chu a lo darh ta chum chum mai a nih kha.
Pentikos Ni leh he ni a lo thleng Pa tirh Thlarau Thianghlim hi lei Kohhrante tan a hlu em em a. Khawvel pum huap kristiante Calendara Ni pawimawh kum tina an hman thin chu keini Zoram Kohhrante pawhin a din tirh atangin kan lo hmang ve ta zel a ni.
Amaherawhchu BCM Assembly chuan ngun taka a ngaihtuah hnu-ah Judate kut chhawm zui zel anga lang ve ngawt lovin, Thlarau Thianghlim Thlen Ni ti- a hman turin a lo rel leh ta a ni.
