February 23, 2023 (Ningani) khan Mizoram Baptist Kohhran Hmeichhe Pawl (MBKHP) Rorel vawi-73-na chu BCM Biak In, Ramthar, Lunglei-ah neih a ni a. Rorel Inkhawm hi Lalvohbiki, President, MBKHP-in a kaihruai a. Hun hmasa lamah Pathian hnena inkawltirna leh inhmelhriattirna neiin, Kum 2022-2023 MBKHP Rorel inkara member chatuan ram panta te mi 274 sunna neih a ni. Palai chhiarna neiin Rorel palai hi an vaiin 547 an ni.  MBKHP Rorel Inkhawmah hi Assembly aiawhin Rev. R. Lalbiakliana, General Secretary leh Rev. ZD Rodingliana, Fellowship Department Director ten an telpui a. An ni bak ah hian fellowship dang MTKP, MBMP leh KNP atangin Rorel palai an awm bawk.

Report hrang hrang ngaihthlak a ni a, Secretary Report chuan - BKHP hi Pastor Bial 92 -ah Unit 458 an awm a, member 33,131 an awm mek thu a tarlang a. Kum hmasa aia member punna 730 a nih thu leh kum 2022-2023 MBKHP Rorel inkarah Member boral 274 an awm thu a tarlang bawk.  Kum 2023  BKHP Day Thawhlawm chu Mission Pual atan hman tura rel fel a nih thu te, MBKHP Inkhawmpui 2024 chu Lungsen pastor Bial-ah nghah a nih tur thu te leh MBKHP hruaitute hmun hrang hranga an feh chhuahna te tarlangin, December 8, 2022 khan MBKHP Chhawmdawlna In, Melte Silver Jubilee lawm a nihthu te, MBKHP-in kum tin a a kalpui thin - Mirethei-Kuttualhleichham tanpuina atan cheng nuai 3, sing 8, leh 800 an sem chhuah thu te, Missionary damlo te leh harsa mi 56 an tanpui thu te, Misson Field-ah Biak In sak leh chhiatna tawk te tanpuina an pek thu te tarlan a ni bawk.

Rorel thu passed te –

1. Chhawmdawlna In awareness campaign neih.
2. Thuzir Exam kum tina kan neih thin hi MBKHP-in buaipui chhunzawm zel ni rawh se.
3. BKHP Inkhawm zan apiangin ṭawngṭai subject ah - Zu leh Ruihhlo ngai te leh a zuar tu te, Kan ramah Thlarau Thianghlim harhna tak tak a lo thlen theih nan, Kan hma lawka Inthlanpui lo awmtur atan, ram hruaitu ṭha thlan chhuah an nih theih nan tih te leh Cancer damdawi hmuhchhuah anih theih nan, kan ramah Cancer natna a lo tlêm theih nan leh a vei ten thlarau damna an lo chan theih nan tih te telh ni se,
4. Christian Hospital Lawngtlai pualin unit tin vawikhat  fehchhuah nise,
5. Christian Hospital Serkawna hman tur thisen tih khangna (Diathermy Machine) lei nan Unit tinin theih ang angin ṭanpui ni se;
6. MBKHP hmingin BCO theih ang angin unit tinin ṭanpui nise.
7. Naupang humhalh chungchang BKHP unit tinah uar taka inzirtir neih nise.
8. Ram tan, Ruihlo ngai te leh a zuartute tan, Mizoram a Home hrang hranga ruihhlo ngai te leh enkawltu te tan chawnghei tawngtai neih.
9. 2023-2024 Plan leh Budget ruahman cheng nuai 12 chu pawm a ni bawk.