October 31, 2023 (Thawhlehni) chawhma dar 11:00 khan Hqrs.Office, Committee Room No.1 ah Medical & Health Department Committee Meeting neih a ni a. Meeting ah hian kum kal lai (2023-2024) chhunga department report hrang hrang tarlan a nih bak ah, kum thar (2024-2024) department budget leh plan thlirho a ni a, department kaihhnawih thu pawimawh engemawzat rel a ni.
Report chuan thawktu thar pahnih Dialysis Technician (contract) leh Physiotherapist (Fixed pay) an neih thu te, School of Nursing, Christian Hospital Serkawna GNM zir turin mi 20 lak an nih thu te, Mizoram Nursing Council (MNC) hnuaia GNM Exam 2023-ah Nursing School zirlaite tha taka an pass thu leh batch hrang hrang atangin Top Ten-a tling mi 9 an awm thu a tarlang a.
Christian Hospital tih changtlunna atan Physiotherapy khawl thar cheng nuai 26-man lei felinin hman tan a ni tawh thu te, Traction machine, Hydrocollator (Heat machine), TENS machine, Ultrasound machine te lei felin hman mek a nih thu leh Christian Hospital Lawngtlaiah OT light thar leh diathermy khawl thar leiin bun fel a nih thu te, Endoscopy khawl thar nei turin hma lak mek a nih thu a tarlang bawk.
Christian Hospital Serkawn Poor patient fund atan mi hrang hrang leh pawl hrang hrang 615 te atangin Rs 12,16,453 hmuh a nih thu te, hemi chhung vek hian damlo 119 tan Poor Patient Fund atangin Rs 10,85,357 hman a nih thu te tarlangin June – September 2023 chhungin Christian Hospital Lawngtlai Poor patient fund ah mi mal leh pawl hrang hrang 112 hnen atangin Rs 2,84,110 hmuh a nih thu leh hemi chhung vek hian damlo 54 tan Rs 3,12,132 hman ral a nih thu report hian a tarlang bawk.
Meeting ah hian Medical Officer post pali hawn belh dilna te, Ward Sister Post ruak hnawh khah dilna te, Pharmacist post pakhat hawn belh dilna te, Assistant dietician Post pakhat hawn belh dilna te, thawktu Confirm tura dilna te, Assembly in a rel thluk tawh CT Scan khawl lei dan tur ruahmanna te, rilru lam doctor (Psychiatrist) neih ve chungchang te, Nursing School-a zir thei Seat 20 atanga 30 a tihpun tura ruahmanna leh Nurse zir tura lak dan ruahmanna thar te thlira ngaihtuah a ni a. Kum 2024-2025 atana Department Plan leh Budget te pharhin siam that ngai te siamthaa pawm a ni bawk. Heng thurel te hi Assembly leh a ngaihtu committee ah te thlen leh an ni ang.
